“FRANZ SABALONES NAGTAKUBAN NGA PASTOR”

Mga peke na IDs ug dokumento nga gigamit ni Franz Sabalones.

By Tonton Alcos Antogop

 

Sa wala pa siya patya, nagpaka-arun i ingnon nga Pastor sa usa ka simbahan ang self-confessed drug lord nga si Franz Sabalones. Kini base sa usa sa mga I.D. cards nga nakuha gikan kaniya human nga gipusil siya sa ulo ug diha-dihang namatay didto sa atubangan sa usa ka bilyaran sa Mother Ignacia Street sa Dakbayan sa Quezon niadtong kaadlawon sa Huwebes Santo.

Ang patay nga lawas ni Franz Sabalones

Sigun sa maong ID, siya mao si Rev. Jerome Cabilao, Missionary Preacher sa Reform Adventist Church- Sabbath Day Keeper apan iyang usa ka paryente kinsa miadto sa Quezon City Police Department (QCPD) positibong miila kaniya nga mao si Sabalones. Gawas sa maong ID sa usa ka Pastor, nakuha usab gikan kaniya ang mga ID’s nga nag-ila kaniya sa mga pangalan nga Jerome Sanchez-Cabilao, Abdulyakin Tating-Limpasan ug uban pa nga matud sa kapolisan pulos gi-peke.

Franz Sabalones (internet picture)

Ang igo ni Sabalones diha gyud sa iyang ulo makausa, gani nabuak gyud kini. “Suspect/s allegedly onboard a color blue car shot the victim on his head which resulted in his instantaneous death,” tipik sa usa ka SMS report nga nadangat sa Police Regional Office (PRO 7) nagkanayon ug napadangat dinhi sa iNews.ph.

Matud pa sa maong report nga si Sabalones, 41, gikan sa Las Pinas City diin didto siya nagpuyo sa wala pa ang hitabo. Uban sa iyang mga higala, mutan-aw unta sila ug duwa sa bilyar sa sikat ug world class nga bilyarista nga si Dennis Orcullo didto sa Hustler’s Club diin didto siya gipusil sa atubangan niini.

Gikan nanaog sa iyang sakyanan nga usa ka gray Ford Ranger si Sabalones dihang giduol sa namusil kaniya. Ang nagmaneho sa sakyanan ni Sabalones nga nagpaila nga si Jonathan Peter Tiu mitug-an sa kapolisan nga bag-o pa nilang nakaila ang gitumbok nga big-time drug trafficker kinsa gitawag nila sa angga nga “Boss Tisoy” diin sumala pa mahiligon kini nga mag-manager o mag-finance sa mga bilyarista.

Si Sabalones kinsa igsoon ni San Fernando Vice Mayor Fralz Sabalones boluntaryo na kini nga mi-surrender ni kanhi PNP Chief Ronald “Bato” dela Rosa niadtong Agosto 2016 sa Camp Crame. Apan bisan pa sa pag-surrender, na-monitor sa mga otoridad nga padayun gihapon kini sa iyang illegal nga negosyo.

Niadtong nilabay nga buwan, gi raid sa mga tinugyanan sa Provincial Intelligence Branch (PIB) ug sa Provincial Drug Enforcement Unit (PDEU) ang iyang balay sa Modena Subdivision sa Barangay Tunghaan, Minglanilla. Nakuha sa maong raid ang mga armas ug duha ka granada diin didto ang iyang giingon nga lived-in-partner nga si Winifreda Misa ug duha nila ka mga anak.

Si Franz kanhi nagtrabaho nga traffic enforcer sa Dakbayan sa Sugbu sa wala pa kini mahilambigit sa illegal drug trade. Giimbestigar karun sa Anti-Money Laundeering Council (AMLC) ug ubos sa freeze order ang iyang mga kabtangan nga sumala pa mukabat sa P350 milyones pesos.

Sigun sa intelligence report sa mga otoridad, mikusog ang grupo ni Sabalones human sa kamatayun sa laing Cebuano drug lord nga si Jeffrey “Jaguar” Diaz niadtong Hunyo 2016. Napatay si Diaz sa usa ka police operation didto sa Las Pinas City ra usab sa mga kanhi sakop sa PRO 7 Regional Intelligence Division (RID) ug Regional Special Operations Group (RSOG).