“POLIS SA SAMBOAN GIBANHIGAN ATOL SA BIYERNES SANTO. IGSOON SAMDAN USAB”

By Tonton Alcos Antogop

 

Anaa karun sa usa ka tambalanan ang usa ka polis human kini mapusilan didto sa Poblacion Samboan niadtong Biyernes Santo.

Giila ang maong biktima nga si Police Master Sergeant (PMSg) Roy Ryan Cavalida kinsa nadestino sa usa sa mga buhatan sa Police Regional Office (PRO 7) sa Camp Sergio Osmena, Sr., sa syudad sa Sugbu.

Samdam usab sa maong hitabo pasado alas siete ang takna sa kagabhion ang iyang igsoon nga si Nanette Cavalida-Deiparine, kinsa naigo sa sampot nga bahin sa iyang lawas.

Ang maong polis kinsa nadestino sa Regional Operations and Plans Division (ROPD) naigo sa paa ug sa iyang tiyan.

Ning pagkutlo sa balita, padayun pang gisusi sa kapolisan ang motibo sa maong pagpamanhig apan niadtong Pebrero 2016, usa si Cavalida sa mga sakop sa City Intelligence Branch (CIB) sa Cebu City Police Office (CPPO) kinsa girelibuhan gumikan sa kontrobersyal nga drug raid sa barangay Duljo Fatima diin matud pa gibuhian ang duha sa tulo ka mga dinakpan.

Gawas kang Cavalida narelibuhan usab sa maong hitabo sila si Police Staff Sergeant Robert Escarlan, Police Corporal Arnulfo Reglamos, Police Corporal Dennis Mosqueda, Police Corporal Manuel Paez III ug mga Police Patrolman nga sila si Ansar Madtahil ug Perceival Eborlas.

Segun sa inisyal nga tahu, luwan sa mga dagkung motorsiklo ang mga namusil nilang Cavalida kinsa mibiya dayun sa maong dapit.

Adunay mga basiyo sa bala gikan sa M16 armalite rifle ug 9MM nga nakita sa crime scene diin matud pa padulong unta mu-parking sa ilang giluwanan nga sakyanan ang mga biktima sa dihang nahitabo ang pagpamusil.

Si Cebu Police Provincial Director Police Colonel Manuel Abrugena mimando na sa halapad nga inbestigasyon sa maong hitabo.

Matud pa sa pasiunang pakisusi didto sa Samboan, ang pamilyang Cavalida nagkuyog arun pagsaulog sa Mahal nga Adlaw gani gikan sila nag-Visita Iglesia dihang nahitabo ang pagpamanhig kanila.