“KWARTO O KWATRO, MAESTRO SIKOP KUYOG SA MINOR NGA ESTUDYANTE BUGTI SA TAAS NGA GRADO”

Share this on Social Media

By Tonton Alcos Antogop

 

Nadala gyud niya sa kwarto ug posibleng dili na niya hatagan ug grado nga kwatro. Apan kay na-report man sa polis, nabalhug karun sa prisuhan ang usa ka maestro human kini gitumbok nga nakighilawas sa iyang tinun-an bugti sa paghatag ug taas nga grado.

Kusganon hinoon nga gipanghimakak kini sa 24 anyos nga maestro kinsa napaslak karun sa detention cell sa Parian Police Station 1. Sa sayo pa gidakop siya sa mga polis human maabti nga kuyog ang iyang 17 anyos nga estudyante sa Grade 11 sulod sa usa ka lodging house sa Colon Street sa Dakbayan sa Sugbu.

Segun sa blotter sa kapolisan nasikop ang maong maestro kagahapon sa pasado alas nuebe ang takna sa buntag sa dihang mirespondi ang mga polis. Ang Women and Children Protection Desk (WCPD) sa maong presinto pinangulohan ni Staff Sergeant Ada Jungao nag-andam na karun sa tukmang kaso batok sa maong maestro.

Matud pa sa report nga niangkon ang estudyante nga nahilabtan gyud siya sa maestro apan ang nauwahi miingon nga igo lang siya mipamasahe. “Arun kuno siya ma-stress free, nagpamasahe ra kuno siya,” usa sa mga polis nga sakop ni Police Captain Armando Labora nagkanayon.

Ang maong estudyante gi’-turn over na hinoon sa iyang mga ginikanan human kini gipaubos sa medical check-up. Ang kaso nga kalapasan sa Special Protection of Children Against Abuse, Exploitation and Discrimination Act (RA 7610) batok sa maestro giandam pa sa pagsuwat ning balita.

Leave a Reply

Your email address will not be published. Required fields are marked *