“MGA POLITIKO SA LAPU-LAPU NAGPASANGINLANAY NGA NANGHULGA SA ILANG ISIG KAHABIG”

Mga nilansar pagka-mayor sa Ciudad sa Lapu-Lapu

Share this on Social Media

By Tonton Alcos Antogop

 

 

DAKBAYAN SA LAPU-LAPU- Dili lang init apan misangpot na sa mga pamasangil nga nanghulga na sa ilang isig ka habig ang mga nanglansar niining maong syudad.

Human sa presscon kagahapon diin namasangil si Mayoralty aspirant Junard “Ahong” Chan nga gihulga siyang patyon ug gipang-harass ang iyang mga dumadapig maisugon usab nga mitubag gilayon si Mayor Paz Radaza nga ang kampo nilang Chan ang unang nanghulga kanila.

Gihulagway ni Mayor Paz Radaza nga ang gipakita ni Chan kinsa kaatbang sa iyang bana nga si kanhi Mayor Arturo Radaza, lihok sa desperado nga tawo.

“Dili gyud mi ma-desperado siya maoy na desperado kay ngano kalimot siya kinsa may-una…kay ang among supporter si Ahong mismo iyang gilabni ang cell phone sa among supporter, Nelson Ygot , unya gi-erase niya ang mga sulod sa cell phone. I don’t know kung unsay tawag ana, harassment ba o unsa?,” sumala pa sa Mayor sa presscon usab niya sa Lapu-Lapu City hall.

Matud pa sa Mayor nga ang panghitabo ilang gipa-blotter sa kapolisan ug mahimo kini nga sila pa ang unang mupasaka ug kaso batok ni Chan human mahibaw-i sa Mayor nga mupasaka ug sumbong sa Comelec ang grupo sa ilang kaatbang.

 

Ahong presscon

Sa ilang bahin Si Chan kinsa gikuyugan sa iyang line-up sa Team Libre mipasangil nga siya mismo gihulga nga patyon.

Apan segun pa niya gikan ang maong impormasyon sa usa niya ka kanhi dumadapig ug kini iyang nahibaw-an niadto pang sayung bahin niining tuiga.

Sa pasangil nga pagpanghasi ngadto sa iyang mga dumadapig mitug-an si Chan nga lakip sa mga biktima mao si Jimmy Oyanguren sa Barangay Bankal, Gino Maloloy-on sa Barangay Tingo, Lucia Altaya ug daghan pa nga sumala pa niya gipanghulga kay midapig kanila.

Apan matud pa ni Mayor Radza nga isip ilang kanhi kauban sa politika kahibawo siya sa taras ni Chan nga karun mao Barangay Kapitan sa Pajo.

“Kahibawo man mi ana ni Ahong nga maayo na mudala ug drama, nag drama lang siya,” misugilon si Mayor Radaza ngadto sa mga tigbalita.

Si Chan kinsa diha sa tapad sa iyang running mate nga si Dr. Celestino Sitoy ug congressional aspirant, Atty. Eugene Espedido, miingon nga ila gyud ipadangat sa hingtungdan ang maong mga panghitabo.

“Medyo dili na mao ang pagpadagan sa kampanya, ipaabot na namo ni nga reklamo sa kaulohan. Gigamitan na ug kusog sa atung kaatbang,” si Chan miingon kinsa midugang nga, “dili ta magpabot nga dunay kinabuhi nga makalas.”

Matud pa ni Chan nga nakadawat usab sa hulga sa iyang kinabuhi ang iyang kandidato pagka konsehal nga si Josie Hayashi ug ang ilang abugado nga si Atty. Ferdie Dungog.

Segun pa usab ni Chan nga halos tanan nilang tarpaulin gipatangtang gumikan sa mga barangay officials nga dapig sa kampo nila Mayor Radaza.

Mitubag si Mayor Radaza nga dili sila maka-kontrolar sa ilang mga supporters apan miingon siya nga mismo gani si Chan mas grabe pa ang gibuhat niini.

“Kanang among mga materials nga gipapilit ilang gisapawan. Pero wala ra man mi, I think ug election gani part man gyud ning mga ingon ani. Naa man gyuy maingon ta nga nilangkatay sa mga supporters ra man ni. I never expected si Ahong as a candidate for Mayor mu-stoop down siya sa mga trabaho sa supporters,” matud pa ni Mayor Radaza.

Si Mayor Radaza dili na maka pasubli kay talihuman na ang iyang ikatulo nga termino karung Hunyo busa milansar siya isip Congresswoman hulip sa iyang anak nga si Rep. Aileen Radaza.

Segun pa hinoon ni Atty. Espedido nga dako ilang katahap nga tanang mga gipangbuhat nga pagpanghasi ngadto kanila gumikan sa mando ni kanhi Mayor Arturo Radaza.

Leave a Reply

Your email address will not be published. Required fields are marked *