“DEBATE NI TOMAS UG LABELLA NAHINGPIT NA”

By Tonton Alcos Antogop

 

 

Hingpit na ang adlaw sa debate tali nila ni Mayor Tomas Osmena ug Bise Mayor Edgardo Labella.

Kini mismo ang nasayran sa iNews.ph gikan ni Atty. Regal Oliva, ang Presidente sa Integrated Bar of the Philippines (IBP-Cebu City chapter).

“It will be on May 6. It’s already set,” si Oliva mitug-an sa dihang nahinabi.

Matud pa ni Oliva nga walay kausaban sa venue nga mao ang City Sports Center ug kini ipahigayun sa ala una ang takna sa hapon.

Midugang ang bantugan nga abugado kinsa mao usab ang City Treasurer sa Dakbayan sa Mandaue nga ila nang hingpiton ang ground rules sa maong debate uban sa mga representante tali ni Osmena ug Labella.

Kabahin sa wala pagsanong ni kanhi Bise Mayor Michael Rama nga makig-debate batok ni Konsehal Mary Ann delos Santos, muhukom pa niini ang mga opisyal sa ilang kapunungan.

Apan iyang giklaro nga bisan gani ug dili mupatim-aw si Bise Mayor Labella kinsa giingnan nang daan ni Rama nga dili usab mutunga sa debate, miingon si Oliva nga ila gyud nga idayun ang debate bisan pa mag-inusara lang si Mayor Osmena.

Niadto pa untang Abril 22 ipahigayun ang maong debate apan naka-desidir ang IBP nga isibog kini ug laing adlaw sanglit ang maong petsa duol ra kaayo sa pagtapos sa semana santa.

Nagkauyon ang mga opisyal sa IBP-Cebu City nga dili nila buot nga igugol na hinoon sa maong mga opisyal ang pagtuon ug pagpangandam sa debate ang maong mga adlaw imbes himuon nga balaan agi ilabi na ang milabay nga Byernes Santo paingon na sa Domingo sa Pagkabanhaw.

Ang debate sa maong mga opisyal giisip nga maoy giya sa mga botante sa Syudad sa Sugbu sa umaabot nga eleksyon sa Mayo 13 niining tuiga.