“POSPORO NGA GIDUWAAN HINUNGDAN SA SUNOG SA SILANGAN”

By Tonton Alcos Antogop

 

 

Gisusi karun sa mga otoridad nga dunay bata nga nagduwa ug posporo nga maoy hinungdan nga nahitabo ang sunog nga miugdaw ug daghang kabalayan sa Syudad sa Sugbu niadtong Byernes sa hapon.

Nahitabo ang sunog pasado alas 4:00 ang takna sa kahaponon sa Sitio Silangan 2, barangay Tejero nga duol sa Pier 4 sa syudad.

“Giimbestigar na karun kana sa kabumberohan nga dunay bata nga nag-duwa ug posporo mao nga nahitabo ang sunog” pamahayag ni Tejero Barangay Capt. Hermogenes Galang, Jr. sa dihang nahinabi sa iNews.ph.

Si Cebu City Fire Marshall Noel Ababon mibutyag nga segun sa ilang inisyal nga inbestigasyon nagsugod ang sunog sa panimalay sa manag-tiayon nga Shirley ug Preciano Karomayan.

Apan ang igsoon ni Shirley nga si Jonalyn Karomayan mitug-an nga ang sunog didto magsugod sa lawak sa manag-tiayon nga Armand ug Joie Regis.

“Ang iyang anak ra ang naa sa sulod sa kwarto human minaug iyang anak naghilak kay nasunog ang ilaha mao tu nagkayagaw na unya pagku-an ana dako na ang kayo,” si Jonalyn, 24, mitug-an sab sa laing pakighinabi.

Matud pa niya nga tungod sa kusog nga pagkatap sa kalayo, wala gyud silay nahipos sa ilang mga butang.

“Wala lagi Sir tapot sa lawas ra gyud wala gyud miy nadala bisan ug usa ka sinena wala gyud miy nadala,” dugang pa ni Jonalyn nga diriyot na mutulo ang luha sa dugang pakighinabi didto mismo sa duol sa ilang balay nga naugdaw.

Ang lain nilang silingan nga sikbit ra usab sa ilang gipuy-an misugilon nga sa wala pa ang sunog dunay nakakita nga nagdala ug posporo ang anak sa mga Regis.

Ang pamilyang Regis nag-abang sa pamilyang Karomayan ug naa kini nagpuyo sa kwarto nga nahimutang sa ikaduhang andana.

Si Cherry Ann Guzman miingon na ang iyang anak nakakita nga nagdala ug posporo ang anak sa mga Regis ug wala kini mabadlong kung unsa ang gihimo tungod kay nagduwa ug bingo adtong orasa si Joie samtang nagtrabaho usab ang bana niini.

“Mao lagi tu ang anak ni Joie kay si Joie naa na sa bingo-han Sir ,mao nay tinuod nga istorya Sir. Naay dalang posporo misaka sa taas, himan-himan atu Sir mikayo na ug kalit,” si Guzman nga 30-anyos miingon usab sa iNews.ph.

Miingon si Capt. Galang nga gisusi kini karun kun tinuod ba o dili nga nagduwa ug posporo ang bata apan posible usab nga nagduslit kini ug butane niadtong tungora.

 

Mitug-an ang Kapitan nga dali gyud nga midako ang kalayo tungod kay pulos ginama sa mga light-materials ang mga panimalay sa maong dapit.

Segun sa talaan sa Cebu City Disaster Risk Reduction and Management Office (CDRRMO) kinsa mao ang nagdumala sa evacuation center sa Barangay Tejero gym mukabat na sa 1,328 ka mga tawo ang naapektahan sa maong sunod nga miugdaw ug dili momenos sa 200 ka mga balay nga gilangkuban sa 313 ka mga pamilya.

Gisaka sa Task Force Alpha ang maong panghitabo diin mi-respondi na niini ang mga kabumberuhan gikan sa mga sikbit nga dakbayan ug munisipyo sa syudad.

Nakontrolar ang sunog pagdangat na sa alas 6:00 ang takna sa kagabhion human sa alarma sa alas 4:50 sa kahapunon.

Matud pa ni Kapitan Galang nga murekomendar siya ngadto ni Mayor Tomas Osmena nga human nga ideklara nga ground zero ang tibuok dapit, mupahigayun ug re-blocking kun ugaling tugtan ang mga mulopyo nga makatukod ug balik sa ilang mga balay.

Gipanag-iya sa kagamhanan sa syudad ang halapad nga bahin sa yuta sa mga nasunogan apan dunay nagpataliwala niini nga pribado ang tag-iya.

Nanawagan si Galang sa publiko nga nagkinahanglan ug relief goods ang mga biktima tungod kay halos tanan wala gyud makabitbit sa ilang mga butang.

 

Mga Hulagway kuha ni Allan Defensor