“CD GARMA NANGHULGA NGA PATYON ANG MGA BASILLOTE, CCTV KUHA SA CARRETA DILI SA TALAMBAN”

Ang kapikas ni Eddie Basillote nga nahinabi sa mga tigbalita

Kahadlok karun ang gibati sa pamilya sa suspetsadong drug pusher nga si Eddie Basillote human nga gihulga sila mismo sa hepe sa kapolisan sa Dakbayan sa Sugbu nga hutdon sila ug patay.

Si Police Colonel Royina Garma hinoon wala dayun makuha-i ug reaksyon sa mga tigbalita lakip na ang iNews.ph sa maong pamasangil sa dihang giadto sa Cebu City Police Office (CCPO) headquarters.

Matud pa sa kapuyo ni Basillote kinsa mihangyo nga magtaptap sa iyang nawong, gihimo mismo ni Garma ang maong hulga sa dihang gikaistorya ang iyang bana.

Si Basillote kinsa biktima sa giingong “police brutality” gibalhin na karun sa CCPO custodial facility gikan sa Talamban detention cell.

Matud pa sa maong kapikas didto niya nahibaw-i ang maong hulga sa CCPO facility niadtong Sabado, April 27, sa dihang mihatud siya ug pagkaon sa iyang kapuyo.

“Si Garma mi psy-war sa iyaha nga pamatyon kuno mi, hasta akong mga anak. Hasta mga ig-agaw sa akong bana, pamatyon kuno ming tanan,” matud pa sa maong 24 anyos nga ginang nga naghilak samtang gihinabi sa mga tigbalita.

Hutdon matud pa sila ug patay kun ipadayun nila ang pagpakita sa Closed Circuit Television (CCTV) camera footages kabahin sa pagpangulata ngadto ni Eddie ug sa lain pang duha ingon man ang pagpasaka nila ug sumbong batok sa kapolisan.

Ang CCTV camera nga nikuha sa police brutality sa suspetsadong drug pusher nga si Eddie Basillote

“Pamatyon kuno ming tanan ug mugawas kuno kanang ug dili nila i (pa) delete ang video ug ipadayun kuno namo ang kaso.”

Siya nagpakiluoy ngadto ni Colonel Garma nga dili sila patyon kay sila mga kabus ug walay ikasukol ngadto sa maong opisyal sa kapolisan.

“Ang akong ikaistorya ni Garma Mam ba, nga, dili sab mi niya ingnanaon kay pobre mi, wala miy ikasukol niya. Dili mi niya pamatyun kay pobre mi. Tan-awon sa niya ang video ug unsay sakto.”

Iyang giangkon hinoon nga tigbaliya ug ginadiling shabu ang iyang bana apan miundang na kini niadtong 2016 sa pagsugod sa administrasyon ni Presidente Rodrigo Duterte.

Human miundang sa pagka- drug pusher ang iyang bana nag drive na kini ug habal-habal diin duna silay 6 ug 4 anyos nga mga anak.

Gitug-an usab sa maong asawa ni Basillote nga sukwahi sa bersyon sa kapolisan sa Talamban, didto ra gyud sa duol sa ilang balay sa Ponce 2, Barangay Carreta gigakop ang iyang bana ug dili sa Nasipit, Talamban.

Segun sa police blotter didto madakpi sa Nasipit, Talamban si Basillote sa usa ka buy-bust operation ug miingon si Police Major Elisandro Quijano nga lakip ang maong operasyon sa Simultaneous Enhanced Managing Police Operations (SEMPO).

“SEMPO man tu Sir, mao ra gyud akong ikasulti nimo,” si Quijano mitug-an sa iyang bahin sa dihang nahinabi sa iNews.ph didto mismo sa Talamban police station.

Nakumpirmar ang SEMPO gikan sa buhatan ni Police Regional Director Brig. Gen. Debold Sinas diin gipahigayun kini ubos sa “Oplan Stormbringer HULI-Holy Week” gikan niadtong Abril 17 hangtud sa Abril 21.

Nasuwat sa blotter nga pasado alas 6:00 sa buntag ang pagdakop kang Basillote niadtong Abril 18 apan ang iyang kapuyo miingon nga gabii ang pagdakop sa iyang bana sa sulod sa usa ka “Bingo Pinball Cafe” nga gipanag-iya sa ilang paryente.

Ang mga Pinball Machines nga susama ug mga video carera gikuha na sa mga tag-iya niini human nahitabo ang kontrobersya bahin sa pagdakop ni Basillote.

SAKSI MAKAILA SA MGA POLIS

Samtang mitunga usab ang 17 anyos nga inahan niadtong bata nga naigo sa pul-an sa rifle sa usa sa mga polis.

Ang saksi mitug-an nga unom ka mga polis ang mikulata ngadto ni Basillote nga iyang uyuan ra usab.

“Akong nakit-an ang misulod unom” matud pa sa maong menor de edad nga inahan kinsa mabdos.

Miingon siya nga siya pa gani ang miabli sa dihang miabot ang mga polis nga armado tungod kay didto siya kay iyang gibantayan ang maong mga Bingo Pinball machines.

Makaila siya sa mga nawong sa maong mga polis kun iatubang kaniya diin iyang giingon nga ang usa nakaigo gyud sa ulo sa iyang usa ka tuig nga batang lalaki nga iyang gikugos adtong tungura.

“Iya man gud kong gipasibog ato unya nadala ang lubot sa armalite ug ana ba. Sa ulo sa akong anak naigo kay iya man kong gipasibog atu.”

Gawas nga gikulata si Basillote dunay laing duha pa ka tawo nga kauban ang biktima nga gipangulata usab apan wala mureklamo.

Giila sa maong 17 anyos ang mga pangalan sa duha apan tuyo nga gipugngan sa iNews.ph arun usab sila proteksyunan.

Drayber ug konduktor ang duha nga mga kaila ni Basillote.

MAYOR OSMENA MIILA SA MGA POLIS

Samtang giila ni Mayor Tomas Osmena ang duha sa mga polis nga nahilambigit nga mao sila si Staff Sergeant Reoven Carmelo Rota, hepe sa Drug Enforcement Unit (DEU) sa Talamban police station ug usa ka Sgt. Brendro Tudtud.

Giila sila sa Mayor diha sa iyang Facebook account diin ang kadtong polis nga nakaigo sa bata mao ang nagsul-ob ug puting t-shirt nga usa ka Police Officer Magdale.

Ang ubang mga polis matud pa sa Mayor mao silang Aneslagun, Lagunsad, Jaquez ug ingon man sila si Adalim ug Tagalog.

Ang tanang walo ka mga sakop sa DEU Talamban police station girelibuhan na hinoon ug wala na mu-report sa Talamban apan anaa na sa CCPO headquarters

Miingon si General Sinas nga dili pa hingpit nga taktakon gikan sa CCPO ang maong mga polis sanglit kinahanglan pa kini ug clearance sa Commission On Elections gumikan sa election ban.

CCTV FOOTAGE GIKAN SA BUILT-IN CCTV SA BINGO PINBALL CAFE

Nahibaw-an sa iNews.ph nga ang CCTV kuha mismo sa gitaud nga CCTV camera didto sa maong cafe nga gibunlot si Basillote.

Gipakita kini sa usa sa mga paryente sa tag-iya sa kondisyon nga dili ibutyag ang iyang pangalan.

Matud pa niya dihay nagpailang polis nga gusto kuhaon ang CCTV recording box ug hard drive apan wala nila kini mahatag.

Miingon siya nga dunay bahin nga ma-klaro ang nawong sa maong mga polis apan dunay dili tungod kay “dimlighted” kini.

“Gusto nila kuhaon ang box ug hard drive, mga polis man kuno tu,” matud pa sa tinubdan.

Ang Commission on Human Rights (CHR) nag-imbestigar na niining maong panghitabo samtang si Mayor Osmena mitanyag ug P100,000 sa inpormante nga makaila sa matag usa sa mga polis nga giingong mikulata ni Basillote.

Si Garma miingon nga dili maklaro sa video kun mga polis ba gayud kadto sa Talamban police station.

Ang CCTV footage video sa maong giingon nga “police brutality” mudagan ug 7 minutos ug 25 segundos./AAJ