“GARMA SUPAK SA POLICE LINE-UP SA TALAMBAN ANTI-DRUG COPS, MUKIHA SA ASAWA NI BASILLOTE”

Ang kapikas ni Eddie Basillote nga nahinabi sa mga tigbalita

Share this on Social Media

By Tonton Alcos Antogop

 

Dili musugot si Cebu City Police Director Colonel Royina Garma nga mupaubos sa police line-up ang mga sakop sa Talamban Police Station nga gipasanginlan ug police brutality sa suspetsadong drug pusher nga si Eddie Basillote.

Kini tungod kay walay pormal nga kaso ang mga sakop sa Drug Enforcement Unit (DEU) sa maong istasyon sa kapolisan kinsa matud pa niya gipasanginlan lang pinaagi sa social media. “Bakit mo ipo-police line up na walang formal complaint.

It’s just, may nag download sa video tapos at sinasabi nya na si Juan dela Cruz ito at si ganito, si ganyan ganyan. Sabi ko i am offering money na nga eh, dalhin mo sa akin ang original kung sino man ang nag-accuse sa polis, allegedly nag-identify.

Mipasabot si Garma nga importante ang orihinal nga kopya sa CCTV video tungod kay sa iyang nakita nga mga footages diha sa internet dili gyud niya maklaro kun mga polis ba gyud kini sa Talamban.

Ug dili maklaro walay probative value ang maong CCTV footage dugang pa sa naasuy nga opisyal sa kapolisan. Kun ugaling dunay mubarug nga complainant nga suportado sa tin-aw nga CCTV footage dili gyud magmakuli ang iyang buhatan nga pasakaan ug kaso ang mahingtungdan.

Samtang matud pa usab ni Garma nga tungod sa maong panghitabo nakadawat na ug hulga ang mga giilang polis ni Mayor Tomas Osmena sa iyang Facebook (FB) account ug kini bisan pa ug walay igong basehanan ang Mayor sa syudad.

Ang hulga ngadto sa mga polis gipaagi sa mga tawag sa telepono ug diha usab sa Talamban police station FB account. Gihulagway ni Garma nga nasunog na kun nailhan na hinoon sa publiko ang maong mga polis nga aktibo sa kampanya batok sa ginadiling drugas.

“They are harassing Station 8 already, starting yesterday ang daming tumawag sa Station 8 harassing our policeman na. Bantay ka, mamatay ka, may death threat na ang tatlo. Even sa Facebook account ng station nakakatanggap na nang ganon.”

“Nasunog na ang mga operatiba namin. Sunog na. Nakilala na sila lahat.” Sa sayo pa, diha sa iyang FB page, giila ni Osmena ang naglangkub sa operasyon batok ni Basillote nga mao si Police Sergeant Reoven Carmelo Rota, pangu sa Talamban police DEU ug duha sa mga sakop niini nga sila si Sergeant Brendro Tudtud ug Corporal Vernie Magdali.

Si Magdali sigun sa Mayor mao ang nakita diha sa CCTV video nga nakaigo sa pul-an sa iyang armalite rifle ngadto sa usa ka tuig nga batang lalaki nga gikugos sa iyang inahan nga maoy nagbantay sa Bingo Pinball machine Cafe diin didto gisulod silang Basillote ug gipangkulata.

Ang laing mga polis giila ni Osmena sa mga apelyido nga Tagalog, Lagunsad, Adlaim, Aneslagun ug Jaquez. Ang CCTV video didto matud pa makuha sa Ponce 2 sa Barangay Carreta apan ang blotter sa Talamban Police Station nagbutyag nga didto madakpi si Basillote sa usa ka shabu buy-bust sa Nasipit, Talamban niadtong Abril 18.

Kalabot niadtong kapikas ni Basillote kinsa mipasangil ni Garma nga mihulga nga hutdon ug patay ang ilang pamilya mukiha si Garma niini sanglit dili kini tinuod. “Bakit ko sabihin, eh di gawin ko eh, di ba? Pangalawa what will I gain from telling or threathening them kung gagawin ko yan and third I will not stoop down sa level nila.”

“Siguradohin nya ma-prove niya ang allegation niya sa akin ‘coz I will be filing a case against her,” miingon si Garma sa mga tigbalita. Matud pa sa maong 24 anyos nga kapuyo ni Basillote, ang iyang bana mismo maoy misulti kaniya nga hutdon ug patay ni Garma ang ilang pamilya kun dili nila wad-on ang CCTV video labot sa hitabo ug kun ugaling mupadayon sila pagpasaka ug kaso batok sa mga polis nga nahilambigit.

Leave a Reply

Your email address will not be published. Required fields are marked *