“POLIS SA TOLEDO GIPATAY SA RESBAK SA DRUG GROUP”

Si anhing Police Master Sergeant Junard Cinco (courtesy of RMN-DyHP)

By Tonton Alcos Antogop

 

Gitan-aw karun sa mga otoridad nga pagpanimawos gikan sa usa ka drug group nga naglihok sa Sugbu ang motibo sa pagpatay kaganihang buntag ni Police Master Sergeant Junard Cinco sa Dakbayan sa Toledo gibutyag kini ni Police Regional Director Brig. General Debold Sinas sanglit lakip si Cinco sa mga polis nga nakaengkwentro kagabii sa gitumbok nga right hand man ni anhing Steve Go.

Segun sa report sa RMN-DyHP, si Cinco, 39, padulong unta muhatud sa iyang asawa sa trabaho sakay sa ilang motorsiklo sa dihang gibanhigan sa backrider sa riding in tandem pasado alas 8:00 ang takna kaganihang buntag sa Barangay Media Once sa naasuy nga syudad.

Naigo sa ulo ug sa ubang parte sa iyang lawas ang biktima hinungdan sa hinanaling kamatayon niini. Si Cinco maoy usa sa mga sakop sa Provincial Intelligence Branch (PIB) kinsa mi-raid sa notadong suspetsadong drug lord nga si Girly Luage ug sa kauban niini nga si Junel Lasam sa Barangay Basak Nicolas sa Dakbayan sa Sugbu niadtong Lunes sa hapon.

Nisukol ug nakigpinusilay matud pa ang duruha sa kapolisan nga gipangulohan ni Police Captain Alejandro Batobalonos hinungdan nga sila nangamatay. Si Luage gitumbok nga Most Wanted sa Sugbu kinsa gituhuan nga maoy mipuli ni Go human kini mapatay sulod sa Mandaue City jail niadtong 2018.

Si Go gipatay sa iyang kaubang detainee human sila magkalis sa sugal nga hantak. Segun sa police intel report si Luage maoy usa sa mga sanga sa drug network ni Franz Sabalones kinsa napatay didto sa Quezon City niadtong Huwebes Santo apan wala pay bisan usa sa sakop sa iyang pamilya nga mikuha sa punerarya sa iyang patayng lawas.

Gipasabot ni General Sinas nga kinahanglan sila ug scientific proof pinaagi sa pagtandi sa DNA sa patayng lawas ngadto sa pamilya ni Sabalones arun ma-release ang lawas niini ngadto kanila.