“POLIS RA DIAY ANG MIPATAY SAB SA POLIS”

Si anhing Police Master Sergeant Junard Cinco (courtesy of RMN-DyHP)

By Tonton Alcos Antogop

 

Patay ang usa ka polis human kini makigpinusilay sayu kaganihang kaadlawon, Mayo 1, sa iyang mga kaubang polis sa usa ka bukirang barangay sa Dakbayan sa Sugbu. Si Police Corporal Feliciano Yballe, Jr. gi-deklara nga dead on arrival sa Cebu City Medical Center (CCMC) diin siya gidala human sa engkwentro pasado alas 3:00 sayo kaganiha didto sa Barangay Sudlon 1.

Matud pa ni Police Captain Alejandro Batobalonos nga misukol si Yballe sa tracker team gikan sa Provincial Intelligence Branch (PIB) ug sa Drug Enforcement Unit (DEU) sa Cebu Provincial Police Office ug wala kini mutahan hinungdan nga nahitabo gyud ang engkwentro.

Mitug-an si Batobalonos nga si Yballe maoy suspetsado sa pagpusil patay kagahapon sa buntag, Martes, sa laing polis nga si Master Sergeant Junard Cinco didto sa Barangay Media Once sa Dakbayan sa Toledo.

Wala hinoon pa maklaro kun giunsa pag-ila nga suspetsado si Yballe sa pagpatay kang Cinco apan ang mga inbestigador sa CPPO nag-andam na sa ilang katin-awan labot niana.

Gihulagway nga nag-sul-ob ug helmet ang mipusil patay ni Cinco apan dihay mga CCTV footages duol sa nahitaboan nga mahimong muila kanila samtang wala pa sila mutaud sa maong ekipo.

Nagmaneho si Cinco ug motorsiklo kuyog sa iyang asawa sa pagkahitabo samtang ang mipusil kaniya mao ang back-rider sa laing motorsiklo nga mipaduol kanila. Kasamtangang nadestino si Yballe sa City Mobile Force Company (CMFC) apan kaniadto didto siya sa Pardo police station kun diin napusilan sab siya gumikan sa iyang trabaho.

Sakop siya kaniadto sa DEU sa Pardo police apan didto siya napusilan sa Dakbayan sa Talisay diin kaniadto naghitak ang ginadiling drugas. Sigun sa intel report, ang kamatayon ni Cinco gituhuan nga pagpanimawos sa grupo sa bag-o pang napatay nga suspetsadong drug lord nga si Girly Luage sanglit kuyog man kini sa maong operasyon.

Si Luage ug kauban niini nga si Junel Lasam napatay sa engkwentro sa mga sakop sa PIB niadtong Lunes sa hapon didto sa Barangay Basak, Nicolas. Ang report nagbutyag nga si Luage mao ang kanhi right-hand man sa napatay usab nga suspetsadong drug lord nga si Steve Go.

Si Go didto gipatay sa sulod sa Mandaue City jail niadtong Hunyo 2017 sa kauban niining pinireso ug si Luage na ang mipuli kaniya sa drug group nila.