2 BAG-ONG LAYA SA PRISOHAN, GIPAMUSIL PATAY SULOD SA TAXI SA RIDING IN TANDEM

Photo by Leah Villagorda

 by: Ramil Paican

 

Duha ka mga biktima nga bag-o lang nakapyansa sa kasong illegal drugs gipamusil patay sulod sa gisakyan nilang taxi sa riding in tandem nga sakay sa usa ka Mio Yamaha nga motorsiklo, mga alas 3:45 sa hapon, Mayo 3, 2019 sa Barangay Dumlog sa syudad sa Talisay, Cebu.

Giila ang mga biktima nga sila si Joel Generalao alyas “Balo, ug usa ka Alvin Cuevas Morales, pulos mga legal age nga giingong mga residente sa Sitio Kimba, Barangay San Roque sa Talisay City. Sigon pa ni Police Staff Sergeant Glenn Besanda, desk officer sa Talisay City Police Station nga nahinabi sa iNews.Ph bag-o pang nakagawas sa prisohan diha sa Talisay City Hall ang mga biktima human makapyansa sa ilang kaso sa iligal nga drugas.

Giingong upat sila nga misakay sa MRG taxi nga adunay body number 2139 nga gimaniho ni Diosdado Avergas Maguate, 38 anyos ulitawo apan dunay kapuyo. Samtang kuyog sa mga biktima nga sakay sa taxi ang usa ka babaye nga diha sa frontseat nga wa makuha ang pangalan kay midagan tungod sa kahadlok ug usa ka Rian Maldepeña Gabuya.

Matud pa ni Besande nga ang duha ra ka bag-ong laya sa prisohan ang gitarget sa mga suspek. Giingong gituparan sa riding in tandem ang gisakyang taxi sa mga biktima dihang nahunong kini tungod sa senyas sa traffic enforcer nga nagdumala sa trapiko niadtong higayuna.

Suma pa nga gipagawas sa sakyanan ang kaubang sakay sa mga biktima ingon man ang driver ug diha na gipamusil ang 2 ka biktima sa makadaghang higayon. Natusak-tusak sa bala ang lawas sa mga biktima, narekober sa nahitabuan sa krimen ang 18 ka basiyo sa bala sa .45 kalibre nga armas ug usa ka bala nga wa pa makabuto.

Dead on the spot ang mga biktima. Padayon pa ang imbistigasyon sa kapolisan kon may kalabutan ba sa kamatayon sa mga biktima ang nahitabo human kini mangadakpi tungod sa kalapasan sa Section 11, 9165 ubos sa Comprehensive Dangerous Drugs Act of 2002.