49 ANYOS LALAKI SA TALISAY CITY, GIPUSIL SA ULO

Patay ang usa ka lalaki human pusila sa iyang ulo (hulagway kuha ni Leah Villagorda)

by: Ramil Paican

Lalaki nga adunay gika-estorya gipusil patay sa may Barangay Proper Mojon sa dakbayan sa Talisay pasado alas 4:00 sa hapon, Mayo 6, 2019. Patay diha-diha ang biktima nga nailhang si Junwel Malasa Segue, 49 anyos residente sa barangay Mojon, walay trabaho.

Sigon pa ni Patrolman Jhan Jacob Cavite, desk officer on duty sa Talisay City Police Station nga nahinabi sa iNews.Ph, nadawat nila ang tawag mga alas 4 sa hapon. Miresponde sa alarma silang Patrolman Eleazar Belciña ug Patrolman June Zamora ug maoy ilang naabtan ang biktima nga naligo na sa kaugalingong dogo ug wala na’y kinabuhi.

Giingong nadat-ugan pa sa iyang Honda wave nga motorsiko kolor pula ang biktima nga adunay plate number GI-8423. Sa pasiunang imbistigasyon sa kapolisan nasayran nga adunay gika-estorya nga lalaki ang biktima dihang may miduol sa iyang likod nga bahin nga usa ka babaye ug lalaki ug dayong pusil niini tumong sa iyang ulo nga hinungdan sa iyang hinanali nga kamatayon.

Matud ni Patrolman Cavite nga padayon pa ang ilang imbistigasyon sa maong kaso ug wa pa sila’y nakuhang motibo sa mao nga krimen.