BAG-ONG EXTENSION OFFICE SA LTO TALISAY, GISUBHAN

LTO gisubhan na ang bag-o nilang extention office. (Gikan sa wala) Cyril Velasco - Matvel Holdings Corp., Eugene Gador -Chief, LTO Talisay Extention Office & Victor Emmanuel Caindec - Regional Director LTO-7

by: Ramil Paican

 

BAG-ONG EXTENTION OFFICE SA LTO TALISAY, GISUBHAN by: Ramil Paican Maayong balita alang sa mga magparehistro sa ilang mga sakyanan ug kadtong mokuha ug magparenew sa ilang drivers license sa ekstensyon nga buhatan sa Land Transportation Office kon LTO Talisay Extention Office diha sa may Lawaan 3 sa dakbayan sa Talisay.

Gisubhan na ang bag-o nilang extention office aron pagbuwag sa mga magparehistro ug sakyanan ug kadtong mokuha ug magparenew sa ilang mga drivers license. Pinaagi sa bag-ong sistima mas mapadali ang pagparenew sa rehistrasyon sa ilang mga sakyanan, sanglit gila-in naman ang transaction office alang sa mga mokuha ug magparenew sa mga drivers license nga mas langay ang pagproseso.

Matud ni Victor Emmanuel Caindec reheyonal nga direktor sa LTO Central Visayas, natuman nila ang maong programa pinaagi sa tabang sa pribadong sector nga mao ang Matvel Holdings Corporation nga mihatag kanila sa libreng pwesto ug pipila ka mga kagamitan ug ekipo alang sa maong ahensya sa gobierno.

Nasayran nga ang Matvel Holdings Corporation maoy proponent sa upat ka mga buhatan sa LTO ubos sa Public Private Partnership (PPP) program sa gobierno nga naglakip sa LTO Talisay City Extension Office, LTO Naga District Office Camarines Sur, LTO Driver’s License Renewal Office Dumaguete City ug LTO Driver’s License Renewal Office Tagum City, Davao. Ang maong kompaniya maoy nagpatukod sa estruktura ug mga kagamitan, apan gipatin-aw nga wala sila’y labut sa operasyon sa LTO. Ang Matvel Holding Corp. nipaniguro nga hamugaway, maayo nga pagkadumala ug labaw sa tanan sayon ug dali ra kining matultulan.

Dugang pa ni Caindec nga sagad sa mga buhatan sa LTO nagpatuman sa gitawag nilang “fix transaction” kon giusa ang transakyon sa pagkuha, pagrenew ug lisensya ingon man ang pagrenew sa rehistro sa mga sakyanan, “Sayon ra unta ang fix transaction para sa usa ka kostumer kon kleyente kon unta paspas mahuman tanan, pero tungod man gud aning sistima sa atong gobierno nga fix transaction usa ra’y opisina, so atong gibuhat gibuwag nato ang transactions aron ang nagtransact ug rehistro ug nagtransact ug lisensya magbuwag sila sa ilang lingkuranan ug nahimutangan.

Duha ang kahera ug ang transaction sa rehistro paspas di siya kinahanglang hasol sa usa ka transaction nga nalangay for example kanang lisensya nga langan ang proseso” pagpasabut pa ni Caindec. Sigon pa ni Caindec nga gilauman nila nga mosaka pa unya ang gidaghanon sa mga buot magparehistro sa ilang mga sakyanan sa LTO extention office diha sa Lawaan 3 sa syudad sa Talisay. Nasayran nga adunay dili mominos sa dies mil ka mga indibidwal ang mihimo ug transksyon sa maong buhatan matag buawn ug tungod sa bag-o nilang sistima nga gipatuman gilauman nga mosaka pa ang maong gidaghanon.

Gipasigarbo ni Caindec nga air-conditioned ang bag-o nilang gisubhan nga buhatan ug mas hamugaway kini itandi kaniadto nga mangreklamo sa kaalimoot sa lugar. Samtang gipahibalo ni Caindec nga ang ilang buhatan sa may Natalio Bacalso Avenue sa syudad sa Sugbo igo nalang modawat sa buot magparehistro sa ilang mga sakyanan ug kadtong maglukat sa ilang lisensya human makalapas sa lagda sa trapiko. Ang ilang buhatan sa SM Seaside bukas alang sa mga mokuha ug magparenew sa ilang mga drivers license.