KAPOLISAN NAGLIBOG SA PAGPANGRAKRAK SA AMBULANSYA

Kapolisan sa dakbayan sa Naga blangko pa ug naglibog sa hinungdan sa kasong pagpangrakrak sa ambulansya sa lungsod sa San Fernando pasado alas 10:00 kagabii Mayo 6, 2019 nga nahitabo didto sa barangay Inuburan, Naga.

Sa progress report sa Naga City Police Station pinaagi ni P/Master Sergeant Michael Villarmia, unang mitaho sa kapolisan ang security guard sa activity center sa Naga dihang nakita ang usa ka ambulansya nga dunay mga buslot agi sa pinusilan. Giingong upat ka mga tawo ang nanganaog gikan sa ambulansya nga mideretso sa comfort room.

Tungod sa pagduda sa gwardya iya kining gireport ngadto sa mga pulis ug didto na nasuta nga girakrakan ang maong ambulansya. Naglibog ang kapolisan nganong wala modangop sa ilang buhatan ang mga sakay sa ambulansya.

Nasamdan ang driver sa ambulansya nga si Arman Navarro, 38 anyos nga taga Green Hill sa lungsod sa San Fernando, hinoon wala ra masamdi ang mga sakay niini nga silang Harold Ballermo 37 menyo, taga Green Hills, Janice Rosal 35 taga Panadtaran, san fernando ug Rosalie Cajes 37, menyo nga taga Sangat San fernando.

Sumala pa ni Villarmia nga niabut na sa Inuburan, Naga ang ambulansya, apan human rakraki sa wa mailhing mga tawo, mibalik kini sa agi ug didto mitago sa activity center sa Naga, butang nga nakapalibog ug maayo sa kapolisan nganong wala kini modangop dayon sa police station nga duol raman unta kini diha sa activity center./Ramil Paican

 

(hulagway kuha ni Leah Villagorda)