Kalawasan ug kinatawo nasunog, human mabangga ang gimanihong motorsiklo

Aksidente sa Ginatilan, Cebu (mga hulagway kuha ni Rechie Barbusa)

 by: Ramil Paican

Anaa pa karon sa tandugon nga kahimtang ang usa ka construction worker, kansang motorsiklo mibangga sa usa ka multicab nga iyang gikasugat sa kurbadahong bahin sa Barangay San Roque sa lungsod sa Ginatilan, Cebu pasado alas 10:00 kagabii, Mayo 8, 2019.

Matud ni Police Master Sergeant Oscar Perater sa Ginalitan Police Station nga nahibabi sa iNews.Ph misilaob ang motorsiklo nga gimaniho sa biktima dihang mibangga kini sa multicab. Gisusi pa karon sa kapolisan ang report nga improvised ang tangke sa gasolina sa motorsiklo sa biktima hinungdan sa pagdilaob niini.

Suma pa ni Ferrater nga unang gidala sa Malabuyoc hospital ang biktima apan tungod sa kagrabi sa paso nga naangkon sa kalawasan gibalhin kini sa Vicente Sotto Memorial Medical Center sa dakbayan sa Sugbo. Gibutyag ni Perrater nga grabi nga paso sa lawas nga naangkon sa biktima, gani apil nga nasunog ang kinatawo niini.

Ang driver sa multicab nailhang si Andres Baluca Garol Jr. 45 anyos menyo, residente sa Sitio Gusa, Barangay Madridejos sa lungsod sa Alegria Cebu, paingon unta nga mangompra ug isda niadtong higayuna. Paingon sa Ginatilan ang motorsiklo ug paingon sab sa Oslob ang multicab dihang nagsugat ang duha sa usa ka “blind curve”.

 

Nakaangkon ra hinoon ug “minor injuries” si Baluca Jr. nga nakagawas na sa tambalanan ug kasamtangan karon nga anaa sa police station sa Ginatilan. Padayon pa ang imbistigasyon sa maong disgrasya sa kadalanan.