POLIS NANGITA NI KAP SA WA PA SUNUGA IYANG MGA TRAK

By Tonton Alcos Antogop

 

BONBON, CEBU CITY- Dihay mga armadong mga polis nga nangita ni Kapitan Eduardo Cabriana sa dihang wala pa sunuga ang duha niya ka mga mini-trucks kaganihang sayo sa kaadlawon, Mayo 9. Kini subay sa video nga gihuptan exclusive sa iNews.ph diin makita nga dunay mga polis misakay ug patrol vehicle nga iya sa mga sakop sa City Mobile Force Company (CMFC) nga gidumala ni Police Major Chuck Barandog.

 

 

 

Si Clyde Cabriana, kamagwangan nga anak ni Kap Eduardo miingon nga wala sila nga tibuok sakop sa pamilya pag-abot sa mga polis pasado alas tres ang takna kagahapon. Didto sila sa kasal sa iyang manghud nga si Clint, 28, ug ang naabtan ang ila rang katabang sa panimalay. “Didto mi sa kasal sa akong manghud Sir wala silay naabtan sa pamilya namo,” sugilon pa ni Clyde sa dihang nahinabi.

Ang katabang nga dili lang magpaila mitug-an nga gikuyawan siya sa maong mga polis kay mga nagdala kini ug tag-as nga kalibre sa armas. Miingon siya nga gipangita nila si Kapitan Cabriana ug gisuginlan nga didto sa kasal. “Ilang gipangita si Kap kay naningil kuno sa utang niya.

Miingon pud nga patawgan ra nila ug nakahibawo na kuno si Kap kun kinsa sila,” sumala pa sa katabang. Makita sa 5:56 minutos nga video nga dunay usa sa mga polis nga skin-head ang tupi ug nagsul-ob ug antipara. Sa dayun na nilang pagbalik sa ilang mga sakyanan nga car number 51 ug 77, ang maong skin-head cut nga polis miaksyon kini ug sama nga nagkablit ug pusil diin makita sab kini sa video.

Dihang pasado alas dose na ang takna sa tungang gabii dihay mga armadong tawo nga sakay ug mga motorsiklo ang miabot kuyog usab ug nagsakay ug awto. Nag-helmet matud pa ang maong mga tawo ug dihay usa kanila nga minaug ug dayung silab sa duha ka mini-trucks ni Kapitan nga diha giparada sa atubangan sa iyang balay.

Si Clint kinsa napugos ug bangon bisan ug bag-o pang gikasal miingon nga gipabuthan sa maong mga armadong tawo ang iyang usa ka igsoon (ngalan gipugngan) ug lain pa niining mga kauban sa dihang nagtinguha na unta sila nga pawngon ang sunog. “Grabeha lagi nagpabuto pa gyud sila.

Ambot ug unsay sala namo nila giingon man mi nila ani,” si Clint miingon. Nagrabehan ug kasunog ang usa sa duha nila ka truck samtang ang usa naliki ang windshield tungod kay gibunalan o gihampak kini.

Ang mga armadong tawo misibat gilayon pahilayo human sa pagpangsunog ug pagpabuto sa armas. Samtang sa iyang bahin si kanhi Konsehal Roberto “Bob” Cabarubias kinsa misusi sa kahimtang sa mga Cabriana miingon nga nakadawat sab siya ug tahu nga dili na pabotaron ang mga mulopyo sa mga bukirang barangay kun ugaling “solid BOPK” ang maong mga botante.

Gitawag ni Cabarubias ug negative voting ang maong estratihiya diin sumala pa niya karun pa nahitabo sa Dakbayan sa Sugbu. “Negative voting mao nay gitawag nga negative voting kay pananglitan gani ug BOPK gyud ka, oh ayaw lang ug botar ha kay mubotar gani ka, hadlukon lang ba.

Sa ato pa dili nami pabotaran, ang ila lang mga tawo ang makabotar, ” matud pa ni Cabarubias. Sa sayo pa si Mayor Tomas Osmena nagtinguha nga tungod sa nahitabo sa iyang mga supporters iyang gitinguha sa Commission on Elections (Comelec) nga ipaubos sa Comelec control ang Dakbayan sa Sugbu.

Ang Comelec control mahitabo kun dunay presensya sa mga armadong pundok, dunay duguong hitabo sa milabay nga eleksyon ug dunay mga daghang armas nga nasakmit ug higpit nga panagribal sa mga milansar.