Traffic Enforcer gi-ambus sa riding in tandem

by: Ramil Paican

 

Padayon pa nga gisusi sa kapolisan sa dakbayan sa Naga, Cebu ang pagpusil sa riding in tandem sa usa ka sakop sa Minglanilla Traffic Commission (Mitcom) nga nahitabo mga alas 6:30 ang takna sa gabii (May 20, 2019) sa may National Highway sa barangay Tuyan sa nahisgutang dakbayan.

Giila ang biktima nga si Loi Engbino, legal age nga giingong gikan pa nga nagduty sa iyang pagka-traffic enforcer sa lungsod sa Minglanilla. Matud pa ni Police Master Sergeant Michael Villarmia sa Naga City Police Station nga duha ka mga suspek nga sakay ug motorsiklo ang mipusil sa biktima kinsa nagmaniho sa iyang pribado nga sakyanan.

Nakaangkon ang biktima ug ubay-ubay nga samad agi sa pinusilan. Hinoon giingong luwas ra ang biktima ug padayon pa nga gi-atiman sa mga doktor sa usa ka pribadong tambalanan. Giingong padung na unta nga mopauli ang biktima gikan nga nagduty ngadto sa iyang giabangang balay sa barangay Inuburan sa dakbayan sa Naga dihang nahitabo ang pag-ambus kaniya.

Kapolisan blangko pa sa motibo sa pagpamusil, hinoon padayon pa ang ilang pakisusi sa maong insidente.