TULO KA PAGPAMUSIL, 2 PATAY SA SUGBU

By Tonton Alcos Antogop

 

Tulo ka pagpamusil ang nahitabo sa Metro Cebu hangtud sa tungang gabii. Sa pagsuwat ning maong balita, wa pa maila sa kapolisan ang mga napatay sa managlahing insidente sa may downtown area sa Syudad sa Sugbu. Una niini, pasado alas 6:00 ang takna, napusilan ang traffic enforcer nga si Loi Engbino didto sa National Highway sa Barangay Tuyan, Dakbayan sa Naga.

Si Engbino kinsa luwan sa iyang sakyanan padulong unta mupauli sa Inoburan, Naga sa dihang gipusil sa nag-angkas sa “riding in tandem” nga motorsiklo human nga ang biktima gikan sa iyang trabaho isip traffic enforcer sa munisipyo sa Minglanilla. Ang hepe sa Naga police station Police Major Jason Villamater mitug-an nga samdan si Engbino sa iyang dughan ug apapangig.

Anaa karun sa usa ka tambalanan sa Syudad sa Sugbu ang biktima samtang nagpadayon pa ang kapolisan sa pag-imbestigar sa hitabo. Pagka pasado alas dyes ang takna nahitabo usab ang duha ka sunod nga pagpamusil sa mga dalang Manalili ug Colon diin pulos gyud patay ang mga biktima.

Ang mga biktima nga mga lalaki pulos nagbay-ad sa dalan sa dihang miabot ang mga sakop sa kapolisan. Ang lugar sa insidente sa dalan Colon nahitabo sa atubangan sa usa ka inilang fast food chain.