Prime mover truck mibabag sa national highway sa Dalaguete

Naagi-an na ug balik na sa normal ang dagan sa trapiko sa national highway sa barangay Casay sa lungsod sa Dalaguete. Kini human mobabag sa karsada ang usa ka prime mover nga dunay karga nga semento mga pasado alas 6 ganinang buntag (May 22, 2019).

Sigon pa ni P/Corporal Gerzon Alcantara sa Dalaguete Police Station nga mga pasado alas 9 sa buntag nabalik na sa normal ang dagan sa trapiko sa maong lugar human mapadaplin ang nagbabag nga prime mover nga nadisgraysa.

Matud ni Alcantara nga nawad-an sa control ang driver nga si Magno Sanchez Cabanas 48 anyos hinungdan nga mibabag sa tibook karsada ang prime mover. Wala ra hinoon ni matumba apan mitakilid kini ug gamay hinungdan nga may mga nayabo gyud nga semento.

Giingong milanat ug kapin sa duha ka oras una hingpit nga makuha ang nagbabag nga prime mover. Hinoon padayon pa ang imbistigasyon sa maong insidente pagtino kon aduna bay tulubagon ang driver sa mao nga hitabo.