MABDOS GIPUSIL PATAY

Sakop sa SOCO misusi sa gipusil patay nga mabdos sa Lawaan 3, Talisay City (hulagway kuha ni Leah Villagorda)

TALISAY CITY, CEBU- Patay diha-diha ang tulo ka buwan nga mabdos nga gipusil samtang natulog sa ilang pinuy-anan sa Purok Orange, Brgy Lawaan 3 ning syudad kagahapon sa may alas 2:00 ang takna sa kaadlawon. Ang biktima giila sa kapolisan nga si Lindy Campus Braga, 31 anyos, lumad sa maong dapit.

Matud pa sa taho, nakugang sa iyang lawom nga pagkatulog ang silingan sa biktima nga si Liezelda Valiente nga gitoktok ug gipukaw sa nagkadugong 3 anyos nga anak sa biktima ug nangayu ug pakitabang gumikan sa gidangatan sa iyang inahan.

Naabtan sa kapolisan ang nagbuy-ud nga lawas sa nagkadugong biktima nga nasutang may samad pinusilan sa ulo diha sa tupad sa patayng lawas sa biktima ang laing anak niini nga usa pa ka tuig. Nakuha sa mga sakop sa SOCO sa crime scene ang usa ka magazine nga may 12 ka Bala,1 ka recoil spring slide sa dili pa matinong kalibre sa armas.

Wala pa matino sa kapolisan kung pila ka tawo ang nalambigit sa krimen kay kung pangutan-on ang 3 anyos nga bata kung pila ka tawo ang mipusil sa iyang inahan muingon kini nga usa apan tulo ka tudlo ang iyang giisa. Ang kapolisan nakadawat ug report nga dunay bahad ang biktima sa nautangan niini ug salapi./Gene Valenzuela