EMPLEYADO SA APOCEMCO GIPUSIL PATAY

SOCO personnel samtang nagproseso sa crime scene.

NAGA CITY , Philippines- Personal nga panagbangi maoy usa sa mga motibo sa pagpusil patay sa 38 anyos nga safety marshall sa Apo Cement Corp. (APOCEMCO) sa milabayng gabii, Mayo 23, 2019. Si Master Sgt. Michael Villarmia sa Naga City Police Office niila sa biktima nga si Benjie Abaquita, lumad sa Brgy Inoburan ning maong syudad.

Matud pa ni Villarmia nga gikan sa trabaho ang biktima ug paingon na mopauli sa dihang giatangan kini duol sa ilang pinuy-anan sa may Sitio Bayabas, Brgy Inoburan pasado alas 8:00 ang takna sa kagabhion. Nakaangkon ug daghang samad sa pinusilan sa nagkalainlaing parte sa iyang lawas ang biktima nga matud pa sa kapolisan maoy hinungdan sa iyang hinanaling kamatayon.

Ang mga kabanay sa biktima nakig-alayon na sa kapolisan sa inbestigasyon sa maong kaso. Gisusi sa kapolisan gikan kanila kun si kinsa ang posibleng responsable sa krimen. /Gene Anthony Valenzuela