TRAFFIC ENFORCER GIPUSIL PATAY HUMAN MAKAPATAY UG LAING TAWO

LAPU-LAPU CITY, Philippines- Patay ang usa ka traffic enforcer karung buntag human sab siya makapusil ug habal-habal driver sa may Tamiya, Barangay Basak ning maong syudad.

Si Rolando Castillas, sakop sa City Traffic Management System (CTMS) napusilan ni Corporal Jacinto Sagarino nga diha ra sa duol sa dihang gipusil usab ni Castillas ang driver nga si Junny Sollano,38, kinsa mulopyo sa Sitio Humay-Humay, Barangay Pajo.

Ang panghitabo pasado alas 10:00 ang takna kalit kaayo apan nakuhaan kini ug video sa Lapu-Lapu City Nerve Command Center sanglit ang dapit sa nahitabuan dunay nahimutang nga Closed Circuit Television Camera (CCTV).

Makita sa video nga si Castillas, 36, mikanaug sa iyang motorsiklo ug dayung miibot sa iyang gihuptan nga. 45 kalibre sa armas ug dayung pusil ngadto sa nagbarug apan nagtalikod nga si Sollano.

Gitiwasan pa gayud sa namusil si Sollano kinsa nakadagan ug dayung nahapla sa dalan.

Sa dihang mubalik na unta sa iyang motorskilo si Castillas, nasugat niini ang polis nga si Sagarino kinsa nipasalipod sa usa ka delivery van ug mipusil ngadto sa maong enforcer kinsa padayun gihapon nga nagwara-wara sa iyang pusil.

Ang polis nga si Sagarino maoy on-duty personnel sa maong dapit diin nahimutang Mactan Economic Zone (MEZ 2).

Ang biktima nga si Sollano maoy presidente sa Tamiya Riders Association ug gikabangi ang traffic enforcer nga si Castillas. /Ramil Paican ug Richie Brusas

mga hulagway kuha ni: Leah Villagorda