2 ka tawo gipang-salvage sa Tuburan

Nahimo pang dako nga tanghaga sa mga taga lungsod sa Tuburan kinsa kadtong duha ka mga tawo nga gipang-salvage sa may Sitio Matnog, Barangay Putat sa nahisgutang lungsod.

Sigon pa ni P/Staff Sergeant Joelymar Gilbuena, desk officer sa Tuburan Police Station nga mga alas 5:00 sa buntag (May 28, 2019) giingong nakit-an sa usa ka Nelson Arnado ang duha ka patay nga lawas ug gireport kini dayon ngadto kang P/Corporal Ricolito Balicasag sa Tabuelan Police Station ug mao nay mitawag sa maong insidente sa Tuburan Police Station.

Matud ni Gilbuena nga dili na mailhan ang mga panagway sa duha ka mga biktima. Giingong gibinaklid sa pagposas ang usa samtang nag-ubo ang laing biktima.

Di sab nila matino kon may samad pinusilan ang mga patay’ng lawas sa duha ka mga biktima sanglit anaa na kini sa “advanced state of decomposition”.

Sigon pa ni Gilbuena nga basi sa hulagway nga ilang nakuha, wala kini nakitang timailhan nga gisunog ang mga lawas sa biktima sanglit wa man masunog ang mga sinina nga gipangsul-ob niini.

“Posibleng sa sobrang kainit sa adlaw mao nga ingon ug sa nasunog tan-awon ang duha ka patay’ng lawas”, pagpasabut pa ni Gilbuena. Di pa usab matino sa kapolisan kon didto ba gipatay sa lugar ang mga biktima o didto lang gilabay sa mga mamumuno.

Ang patay nga lawas sa mga biktima sa salvage anaa karon gipahiluna sa St. Francis Funeral Homes sa lungsod sa Tuburan, “Alang niadtong mga nawad-an ug mga sakop sa pamilya mahimo silang magpakisayod sa nahisgutang punerarya”, panapos pa ni Gilbuena.