KABOS PADATOON NIA NA SA CEBU

COMPOSTELA, CEBU- Kabos Padatoon (KAPA) ania na sa Sugbu. Apan sulagma nga paghiabot sa iNews.Ph sa ilang buhatan diri sa Poblacion Compostela dihay mga polis sa Criminal Investigation and Detection Group (CIDG) nga nagsusi kanila.

“May order ang taas sa amin na mag-imbestiga kami sa kanila,” pagpasabot ni Police Major Lirio Coral, opisyal sa CIDG-7 ubos ni Police Lt. Col. Lito Patay.

Sa wala pa ang pakisusi nga gibuhat nila ni Coral, mipahimangno nang daan si Police Regional Office (PRO-7) Regional Director Brig. General Debold Sinas nga likayan ang maong grupo lakip na ang uban pang sama kanila nga naghatag ug dagkong interest returns nga suma pa niya usa ka “investment scam”

Si Sinas mipahimangno ngadto sa kapolisan nga dili muapil ug mu-invest sa maong grupo. Apan si Engr. Christopher Abad, ang Officer-in-charge (OIC) sa KAPA-Cebu Chapter miingon nga dili pagpangilad ang ilang gibuhat tungod kay daghan na sa ilang mga myembro ang nakadawat ug “pay-out” nga mukabat ug 30 por ciento matag buwan.

 

Engr. Christopher Abad, OIC sa KAPA-Cebu Chapter

Gipasabot ni Abad nga dili sama sa ubang mga dagkong negosyante ang ilang founder nga si Pastor Joel Apolinario manggiluloy-on nga tawo ug gusto gayud nga mudato ang mga pobre. “Kabos padatoon (KAPA) mao gyud na ang among tumong sa pundok, mao nga ihatag gyud namo kung pila ang dapat ihatag,” si Abad kinsa kanhi usa ka Overseas Filipino Worker (OFW) sa Saudi Arabia miingon sa iNews.Ph. Matud pa niya nga siya mismo nakadawat na sa iyang “blessing (pay-out)” kun diin nagsugod lamang siya sa kantidad nga P30, 000 ug kini nahatagan gyud sa pay-out nga 30 por ciento nga interest matag buwan.

Sukad niadto nakad-desidir na siya nga dili na mugawas sa nasud arun mutrabaho apan nagpadayun lamang siya sa KAPA ug iya nang gidako ang iyang “donation” nga miabot na ug milyones ka pesos ang nadawat niya nga pay-out pinaagi sa gitawag ug “compounding.” Gipasabot ni Abad nga dako ang ilang interest nga gihatag kay dili sama sa mga Chinese tycoon ug uban pang mga dagkong negosyante nga ang ginansya adto mapunta sa pagtukod ug lain pang negosyo, si Pastor Apolinario gusto nga i-uli ngadto sa mga myembro ang ilang kwarta pinaagi sa taas nga interest.

Miingon usab si Abad nga bisan ug tag 30 por ciento na ang ilang gihatag nga interest nakapatukod pa gyud ug uban pang negosyo ang KAPA sama sa mining, aquaculture, hospital, schools, banana plantation, gasoline stations, convenience stores ug daghan pa. Sa pangutana kun kanus-a sila miabot sa sugbu, mitug-an si Abad nga nagsugod sila niadtong Marso 17, 2019 sa Catarman, Liloan ug dili pa dugay nga nibalhin na sa Compostela tungod kay apeke na kaayo ang ilang lugar didto sa Liloan.

Matud pa ni Abad nga labing menos 500 ka mga bag-ong myembro ang ilang madugang matag adlaw karun ug mukabat na sa 25, 000 karun ang ilang nasakop sukad niadtong Marso. Miingon si Abad nga dili lamang mga taga Cebu ang ilang mga myembro, dunay gikan sa Bohol, Negros, Siquijor ug gani ang uban nga taga Mindanao nga layo usab sa ilang ubang chapter. Si Abad mitug-an usab nga duna na silay mga myembro nga langyaw (foreigner) sanglit matud pa niya open-membership ang KAPA.

Ang matag myembro mupirma ug Certificate of Membership diin nalakip niini ang Deed of Donation ngadto sa KAPA-COMMUNITY MINISTRY INTERNATIONAL INC. Ang donation nga salapi mao ang investment sa myembro ug kini mao ang mahatagan sa 30 porcento nga interest matag buwan diin ang minimum donation P5,000. Si Abad sakop sa Seventh Day Adventist (SDA) didto sa Bislig, Surigao del Sur diin didto niya mahimamat si Pastor Apolinario pinaagi sa kapikas niini sanglit managkauban sila sa SDA Youth didto sa maong dapit.

Gawas sa donation nga mutubo ang salapi, ang KAPA dugang pa ni Abad nagtanyag usab ug “car financing loan” sa ilang mga myembro ug ila nang gihan-ay karun ang “housing loan.”

“Basta kami gusto gyud ni Pastor Apolinario nga tabangan ang atong mga kabos nga igsoon kay ang kakabos mao sagad ang hinungdan nga ang tawo makalimot sa Ginoo. Kami nagtuo nga dili lamang ang spiritual nga panginahanglan ang importante, importante sab ang physical kay kun maayo ka sa physical mudako pa gyud ang imong pagtuo sa spiritual.” Diha sa ilang membership form, naghisgot ang KAPA sa Matthew 25: 34-37 (welfare ministry) ug sila nagpaila nga religious organization.

Ang Securities and Exchange Commission (SEC) mipagawas na sa Cease and Desist Order (CDO) batok sa KAPA apan matud pa ni Engr. Abad, dili sila mapugngan sa SEC sanglit klaro sa Batakang Balaud (Phil. Constitution) ang “Separation of Church and State” busa dili sila mahilabtan tungod kay relihiyuso man ang ilang pundok.

Gikan sa Bislig, mibalhin ang KAPA sa Alabel, Sarangani province diin daghan ang nahimong sakop niini gikan sa General Santos City, South Cotabato ug uban pang bahin sa SOCCSKSARGEN area. Nangankon si Abad nga muabot na ug 5 milyones ka mga tawo ang ilang myembro./AAJ

 

mga hulagway kuha ni Allan Defenso