Gipalimpyo sa kasilyas ni Sir, gilugos

Kini maoy gidangatan sa desi siete anyos nga babay’ng biktima gikan sa mga kamot sa iyang assistant manager sa usa ka dakong tindahan sa may barangay Poblacion Ward 2, Minglanilla Cebu.

Matud pa ni P/Master Sergeant Junyl Ater nga ang suspek (ngalan gipugngan) 21 anyos ug giingong assistant manager sa tindahan misugo sa biktima paglimpyo sa kasilyas nga nahimutang sa second floor.

“Samtang naglimpyo sa kasilyas ang biktima, nagsige ug tan-aw kaniya ang suspek ug didto kalit nga gibira ang biktima ug gilugos ug nakuha gyud ang pagkababaye niini”, sigon pa ni Ater.

Nahitabo ang insidente sa mga alas 4:40 sa hapon niadtong Mayo 27, 2019 apan nareport ni sa biktima ngadto sa kapolisan sa mga alas 12:40 na sa udto Mayo 28, 2019.

Hinungdan nga gi-aksyonan dayon sa kapolisan ang sumbong sa biktima ug nadakpan nila ang suspek. Gitambagan dayon ang biktima sa Women and Children Protection Desk nga magpahiling sa Pink Room sa Vicente Sotto Memorial Medical Center aron maoy mahimong basihan ang resulta niini sa pagpasaka ug kaso batok sa suspetsado.