Huwaton pa ang resulta sa DNA test

Duna nay nagpakisayod niadtong duha ka mga tawo nga gipang-salvage ug gisunog pa gyud ang mga lawas ug gibalay sa bakante nga luna sa may Barangay Putat, lungsod sa Tuburan.

Matud pa ni P/Staff Sergeant Joelymar Gilbuena, desk officer sa Tuburan Police Station nga nahinabi sa iNews.Ph nga dili pa madeterminar kon ila ba gyud nga kabanay kadtong duha ka mga biktima sa salvage, “Ang resulta ra gyud sa DNA test ang makasulti kon ila ba gyud to nga kabanay’, pagpasabut pa ni Gilbuena.

Wala pa usab nila ipagawas ang giingong pangalan sa duha ka mga biktima sanglit di paman sila sigurado niini. Hinoon usa sa mga gituhuang kabanay nga mitan-aw sa sunog nga sinina sa usa sa mga biktima ingon ug sa nahugno kini.

Apan bisan pa niini dili pa sila makasulti kon mao na ba gyud kini ang ilang kabanay nga nawala sanglit paabuton paman ang resulta unya sa DNA test. Kahinumduman nga duha ka mga lalaking gituohang gi-salvage ug gipangsunog ang mga lawas ang napalgan sa usa ka bakanteng luna sa Barangay Putat, lungsod sa Tuburan.

Maglisud na pag-ila ang mga pulis sa dagway sa mga biktima kay gawas nga gipangsunog, hapit na pud kini manga-agnas./Ramil Paican