KAPA MUSALMOT SA MPBL

MPBL MOA signing ni MPBL Comm. Kenneth Duremdes with KAPA founder Joel Apolinario and MPBL chief of operations Zaldy Realubit (hulagway tampo ni: Arnel Arsolon / Pacman Radio Gensan)

Ang Kabos Padatoon (KAPA) dunay team nga musalmot sa Maharlika Pilipinas Basketball League (MPBL). Kini luyo sa bahad sa Securities and Exchange Commission (SEC) ug gi-isyu niini nga Cease and Desist Order (CDO) batok sa pundok relihiyuso nga gipangulohan ni Pastor Joel Apolinario.

Sa usa ka press conference sa Road Haus Hotel sa General Santos City karung adlawa, mipatim-aw si Apolinario uban nila ni MPBL Commissioner Kenneth Duremdes ug MPBL Chief of Operations Zaldy Realubit alang sa pagpirma sa Memorandum of Agreement nga musalmot ang KAPA uban sa Sarangani Province isip local government unit (LGU) partner niini.

Dili tiaw ang gastuhon sa usa ka MPBL team, franchise fee nga 10 milyones ka pesos ug sweldo sa matag player kada buwan nga P150,000 ang maximum. Matud pa ni Apolinario nga gusto niya tabangan ang mga sakop sa KAPA nga dunay “talento” sa basketball apan si Realubit mipasabot nga depende ra ni Apolinario kun si kinsa ang iyang kuhaon nga mga players.

“Gusto lang nako makatabang sa mga athletes nga dunay mga talento,” miingon si Apolinario pinaagi sa Facebook live video sa broadcaster nga si Arnel Arsolon sa Pacman Radio Gensan. Si Realubit miingon nga dili mahimo ang import apan makaduwa ang mga kanhi PBA players sa team ni Apolinario nga kinahanglan dunay tulo ka mga “homegrown players” diin 15 ang myembro niini.

Sa iyang bahin niingon si Commissioner Duremdes nga ang MPBL naghatag ug kahigayunan ngadto sa mga basketball players nga dunay abilidad nga wala pa makita sa daghang tawo pinaagi diha sa live television. “We are giving them the ladder of opportunity,” matud pa ni Duremdes diin ang MPBL games makita live diha sa S & A sa Channel 23 sa ABS-CBN.

Ang MPBL namugna ni Senador Manny Pacquiao ug karung Hunyo 12 ang opening niini didto sa Mall of Asia (MOA) sa kaulohan. Ang KAPA kontrobersyal kaayo kay gitumbok kini nga usa ka Ponzi scheme apan si Apolonario nanalipod tungod kay matud pa niya walay myembro sa KAPA nga mireklamo batok kanila.

Ang matag myembro dunay donation nga P5,000 minimum ug kini dunay tubo (interest) nga 30{481076ee53a1fc97de0369f33ed2e92f10b25aa7745daa7b1993dd39620a4254} matag buwan nga mudako pa ug imo kining patubuon pinaagi sa “compounding.” Ilang gitawag nga “blessing”, “love gift” ang nahatag nga mga pay-out ngadto sa mga myembro.

Ang KAPA nagsugod sa Bislig City, Surigao del Sur ug mibalhin sa Alabel, Sarangani ug uban pang dapit sa Mindanao. Niadtong Marso niabot na kini sa sugbu ug nagbase kini sa munisipyo sa Compostela./Tonton Alcos Antogop