Kapitana sa Barangay Balao, Barili patay sa aksidente

PATAY ang barangay Kapitana sa Balao, Barili, Cebu samtang naangol sab ang upat ka mga tawo lakip ang duha ka managsuong bata sa aksidente sa tulo ka sakyanan sa Sitio Tayong, Brgy. Guibuangan, Barili alas 9:30 am kaganihang buntag (May 29).

Ang namatay sa Barili District Hospital mao si Balao barangay kapitan Heraclea Himaya Lastimosa, 70 anyos. Sakay si Lastimosa sa Suzuki Smash motorcycle nga gimaneho sa iyang pag-umangkon nga brgy tanod Rolando Himaya Rebuyas, 36 anyos. Ang duha sab ka pag-umangkon ni Rebuyas nga si Janelle, 10 anyos ug Jerone, 4 anyos, miangkas sab motorsiklo kauban ni Lastimosa. Mamalit untag para sagol sa spaghetti ang grupo sa kapitan didto sa Dumanjug tungod kay birthday ni Janelle.

Sigon sa kapolisan sa Barili pinaagi ni Police Captain Janus Giangan, ang motorsiklo ug usa ka ten-wheeler HOWO Truck nagsunod kini nga nagdagan gikan sa Barili proper paingon sa Dumanjug. Apan gikasugat nila ang usa ka blue Mazda pick-up nga iya ni Leonardo Librando (taga Badian) ug gimaneho ni Rico Silvano Broce, 42, gikan kini sa Badian paingon sa Tubod Barili. Sigon sa kapolisan, ang Mazda pickup mi-overtake sa usa ka sakyanan, apan mikawat kini sa pikas lane hinungdan nga na-sideswept ang motorsiklo nga gisakyan sa grupo sa kapitan.

Nangalagpot ang kapitan, ang pag-umangkon nga driver ug duha ka bata ngadto sa kalsada. Ang Mazda mipadayon pa ug mibangga sa ten-wheeler truck. Wa ra maunsa ang driver sa truck nga si Monico Basister, taga Mandaue. Ang truck iya sa YLAD Construction and Trading Corp sa Carmen. Nakaangkon og minor injuries ang driver sa Mazda nga si Broce apan tua ra kini gihold sa police station.

Samtang ang mga sakay sa motor gidali pagda sa sakyanan sa Barili Rescue Team ngadto sa hospital sa Barili. Apan si Lastimosa namatay gyud sa emergency room sa Barili District Hospital. Gibalhin sab si Janelle sa tambalanan sa Cebu City. Sila si Jerone ug si Rebuyas nakaangkon og minor injuries. / Rechie Brusas