TINDAHAN PAHINUNGOD NI CHRISTINE SILAWAN GITUKOD

Christine Lee Silawan tindahan nga gipatukod sa nailang broadcaster nga si Raffy Tulfo (hulagway kuha ni Allan Defensor)

LAPU-LAPU CITY, Philippines- Gitukod karun dinhi ang usa ka tindahan pahinungod ngadto sa murder victim nga si Christine Lee Silawan. Ang Christine Lee’s Sari-Sari Store mao na karun ang gipanag-iya sa inahan ni Christine nga mao si Lourdes.

Sumala pa ni Mayor Paz Radaza iya mismong nakita ang maong tindahan nga gipatukod sa nailang broadcaster nga si Raffy Tulfo. Miingon si Radaza nga siya usab muhatag sa iyang hinabang ngadto sa pamilya Silawan.

“Still ang ang akong intention nga pagtabang sa iyaha naa ra man gyud gihapon so I did promise. Ug musaad ta, ato gyung tumanon,” si Radaza misulti ngadto sa mga sakop sa media.

1 MILYON NGA REWARD IHATAG NA Gawas sa tabang ngadto sa mga Silawan gipahibawo usab sa Mayor nga iya nang ihatag ngadto sa Lapu-Lapu City Police Office ang 1 million reward money human nga nasulbad ang Silawan murder case.

Gipasabot sa Mayor nga gikan ang maong salapi sa Office of the Mayor sanglit dunay budget alang niini. Ang reward adto na niya ihatag human na unya sa arraignment sa kaso. Gitakda unta ang arraignment sa kaso karung adlawa, Mayo 29, apan gisibog kini ni RTC branch 70 Judge Christine Muga-Abad ngadto na sa Hunyo 7 sanglit wala diha ang abogado sa suspetsado nga si Renato Llenes.

Si Attorney Manuel Degollacion mao ang abogado ni Llenes. Matud pa ni Llenes nga iyang angkunon sa korte ang pagpatay ngadto ni Silawan. Kahinumduman nga si Silawan, 17, usa ka kolektor ug amot sa simbahan, gipatay ug nakaangkon ug daghang samad dinunggaban niadtong Marso 10 ning tuiga sa Barangay Bankal.

Giangkon ni Llenes ang maong krimen pinaagi sa usa ka extra-judicial confession diin iyang gi-detalye ang tanan lakip na ang paglaplap sa nawong sa biktima. Miingon si Llenes nga nakat-unan niya ang paglaplap diha sa “Momo Challenge” sa Youtube sa internet.

Nagkauyab sila ni Christine Lee sa Facebook human nagtakuban si Llenes sa pangalan nga CJ Diaz./Tonton Alcos Antogop