Driver sa awto nga nakatulog, mibangga sa 2 ka motorsiklo

Insidente sa Barangay Tangbon sa lungsod sa Samboan naglangkob sa usa ka auto ug duha ka motorsiklo (mga hulagway tampo ni Rhandi Gorion)

Nahitabo ang insidente sa national road sa may Barangay Tangbon sa lungsod sa Samboan, Cebu mga alas 7:45 sa buntag (Mayo 31, 2019). Matud pa ni P/Staff Sergeant Joseph Bilangoy sa Samboan Police Station nga nahinabi sa iNews.Ph nga “head on collision” ang nahitabo diin mibanga ang Mazda nga awto nga kolor green (Plate # DRT 127) sa duha ka mga motorsiklo nga gikasugat niini.
Ang awto gimaniho sa usa ka Giovan Carmona 28 anyos nga taga Barangay Gawi, Oslob Cebu. Sigon pa ni Bilanoy nga nakatulog kini samtang nagmaniho sa iyang sakyanan. Giingong maayong pagkalabay sa mga sakay sa motorsiklo. Giila ang unang biktima nga si si Michael Rusiana 22 anyos, taga Barangay Dalakihan, Samboan.
Ang laing motorsiklo nga nadisgrasya gimahino sa usa ka Marian Ann Ronulo, 21 anyos ug ang angkas niini nga si Everlyn Ronulo, 22 anyos nga pulos taga Barangay Matutinao, Badian Cebu.
Dugang pa ni P/Staff Sergeant Bilangoy nga gidala na sa labing duol nga tambalanan ang mga biktima,”Medyo grabe ang kahimtang ato nila pero conscious man sila”, pagpadayag pa ni Bilangoy.
Samtang ang driver sa awto anaa pa karon sa kustudiya sa kapolisan ug posibleng mag-atubang sa kasong reckless imprudence resulting to physical injuries and damage to property.