GASOLINE BOY GIPUSIL KAY NANGOTOT

CEBU CITY, Philippines-Talandugon karun ang kahimtang sa usa ka gasoline boy didto sa Guindulman, Bohol human siya gipusil sa usa ka gwardya human sila nagkalalis sa iyang “pagpa-ngotot.”

 

Ang gwardya nga namusil sa gasoline boy

Giila ang biktima nga si Marvin Balauro, 18, gasoline boy sa Seaoil gasoline station didto sa Barangay Canhaway sa Guindulman.

Segun sa report sa Bombo Radyo Cebu, gipusil si Balauro sa gwardya nga si Jonathan Perocho, 29 anyos, human nga sila naglalis kay mipabuhagay sa hangin nga baho gikan sa iyang lawas ang maong biktima niadtong Myerkules sa hapon.

Gikutlo sa report ang hepe sa kapolisan sa Guindulman nga si Captain Jerry Leones kinsa miingon nga ang “pagpangotot” gyud sa biktima ang sinugdanan sa hitabo.

Sa dihang gibadlong siya sa gwardya kay nagsige ug pangotot, si Balauro nasuko ug giingnan ang suspetsado nga matud pa dili siya angayan nga badlungon gumikan kay dayo lamang kini didto sa Guindulman.

Nasayran nga ang suspetsado mulopyo sa munisipyo sa Dagohoy nga layo ra sa Guindulman samtang ang biktima mag-ulian sa sikbit ra nga munisipyo sa Anda.

Tungod sa ilang pagtinubagay gumikan sa pagpangotot, gipusil gyud sa gwardya ang maong gasoline boy nga si Balauro gamit ang iyang service shotgun kinsa naigo diha sa iyang dughan.

Anaa pa karun sa tambalanan ang biktima nga gasoline boy samtang ang suspetsadong gwardya nag-atubang na karun sa kasong frustrated homicide.

Ang kapolisan nisuta nga sakop sa Arowana Security and Investigation Agency nga nag-base sa Dakbayan sa Tagbilaran ang maong gwardya nga namusil./Tonton Alcos Antogop