HABAL-HABAL DRIVER NASAKMITAN UG P11M SHABU

Si Richard Barbosa, 23, alias "Butong" suspetsadong drug pusher nakuhaan ug binultong shabu nga mukantidad ug P11.3 milyones pesos. (mga hulagway kuha ni Leah Villagorda)

CEBU CITY, Philippines- Sideline ang habal-habal apan suspetsadong drug pusher diay. Nakuhaan siya ug binultong shabu nga mukantidad ug P11.3 milyones pesos.

Naila ang suspetsado nga si Richard Barbosa, 23, alyas “Butong” mulopyo sa Sitio Bayotan, Barangay Duljo Fatima. Sa report nga nadangat sa Police Regional Office (PRO-7), si Barbosa gidakop sa mga tinugyanan sa Mambaling police station pasado alas 9:00 ang takna kagabii pinaagi sa usa ka buy-bust operation.

Nakuha gikan kaniya ang shabu nga 1.675 kilos nga gisulod ug bag nga maglakip sa usa ka dakong ziplock transparent plastic, ug laing pang 17 ka pakete human nga iya kining bitbit sa dihang gipahigayun ang buy-bust.

Usa ka police poseur buyer ang mitransaksyon ngadto ni Barbosa diin lakip sa ebedensya kaniya ang marked buy-bust money nga P50,000 duha niini orihinal nga 1,000 bill nga gipaibabaw sa boodle money.

Segun sa kapolisan, ang pagdakop kang Barbosa maoy follow-up sa nahiunang pagsikop sa usa ka Ursulino Alfafara diin iyang gibutyag nga si Barbosa ang iyang tinubdan sa shabu.

Si Barbosa sa dihang gipaubos sa tactical interrogation mitug-an nga sinugo lamang siya sa usa ka pinireso nga naa sa Cebu City jail sa Barangay Kalunasan./Tonton Alcos Antogop