Bata nga nagduwa ug posporo, hinungdan sa sunog sa Carcar

Onse ka panimalay ang naugdaw sa sunog sa Sitio Graje, Barangay Guadalupe sa dakbayan sa Carcar. Nadawat sa kabomberuhan ang alarma mga alas 4:14 sa hapon ug nakontrolar mga alas 5:12 (Hunyo 1, 2019).

Matud pa ni FO3 Reynald Redoblado sa Carcar City Fire Department nga ang sunog diha magsugod sa panimalay sa usa ka Anecita Barangan. Sa inisyal nga pakisusi sa kabomberuhan nasayran nga adunay bata kon “Special Child” nga giingong nagduwa ug posporo ug maoy nakaingon sa sunog.

Dugang pa ni Redoblado nga sikit-sikit ang mga balay mao nga milanat gyud ug dugay ang ilang pakigbugno sa kalayo, “Mga light materials man sagad sa mga balay didto”, pagpasabut pa ni Redoblado.

Hinoon walay nasamdan o naangol atol sa maong sunog. Gibana-bana nga mokabat ngadto sa P1 Million ang danyos sa maong sunog.

 

Ang sunog sa Sitio Graje, Barangay Guadalupe sa dakbayan sa Carcar (hulagway tampo ni Dayag Merose)