SINAS MIHULGA NGA DAKPON ANG MGA KAPA OFFICIALS SA SUGBU, MGA POLIS NGA MAGPASAKOP DIS-ARMAHAN USAB

CEBU CITY, Philippines- Mihulga si Police Regional Director Brig. Gen. Debold Sinas nga dakpon ang mga opisyal sa Kabos Padatoon (KAPA) nga anaa na karun sa Sugbu. Misulti niini ang maong opisyal human niya mahibaw-i nga gisupak sa mga KAPA officials ang “closure order” nga giisyu ni Compostela Mayor Joel Quino niadtong Mayo 30 ug gilangkat ang order nga gipatik diha sa usa ka tarpaulin.

Miingon si Sinas nga klaro ang closure order tungod kay walay mayor’s permit ug business permit ang maong grupo nga gimugna ni Pastor Joel Apolinario. Segun pa ni Sinas nga mikiha na si Mayor Quino batok sa KAPA nga naglihok dinhi sa sugbu pinaagi sa usa ka Christopher Abad ug matud pa sa report ngadto ni Sinas, nagdumala niini ang usa ka Benju Barreto.

Ang KAPA Cebu nagbase sa Sitio Hika sa Poblacion Compostela ug matud pa ni Gen. Sinas ilang pang hingpiton ang pagahimoon nila nga lakang. “Karun huwaton lang namo. Magsabot lang mi sa CIDG (Criminal Investigation and Detection Group), kung unsa among buhaton kung pwede na ba ni pangsikupon ning mga tawhana,” si General Sinas miingon ngadto sa mga tigbalita.

Samtang dunay bahad si Sinas ngadto sa mga polis sa rehiyon nga magpasakop sa KAPA. Iya kining ipa-relieve ug padis-armahan arun nga mapakgang ang posibleng kasuko ug pag-gamit sa pusil sa polis kun ugaling dili na mabawi ang iyang investment. Hugtanon ang pahayag ni Sinas nga usa ka “scam” ang KAPA gani iyang giawhag ang publiko nga dili gyud magpa myembro niini.

“Kaning KAPA kung naa moy makita nga polis, naa moy matudlo nga polis nga may investment, automatic relieve, dis-armahan. Kasi kabalo ka ngano, pag musabog tu, di magwala tung polis mao tung sigurado wala na siyay armas.” Sa wala pa ang closure order, duha ka mga security guards sa KAPA ang gidakop ug gi-preso sa Compostela police station gumikan sa dili lisensyado nila nga service firearms.

Sila si Dexter Cuyos, 24, taga San Jose, Catmon ug Robert Padayogdog, 31, gikan sa Baliwagan, Balamban nasayran usab nga walay gihuptan nga mga lisensya isip mga security guards. Si Major Ian Macatangay ang hepe sa Compostela police station ug mga sakop sa Regional Civil Security Unit (RCSU) ang mipahigayun sa operasyon nga pagdakop sa duha ka mga gwardya.

Gibalhug sila sa Compostela custodial facility santang gihan-ay ang mga kaso batok kanila. Si Engr. Abad sa sayo pa mipanghimakak hinoon nga usa ka scam ang KAPA ug gani matud pa niya walay nireklamo nga ilang mga myembro.

Miingon si Abad nga pundok relihiyuso ang KAPA diin muhatag ug 30{481076ee53a1fc97de0369f33ed2e92f10b25aa7745daa7b1993dd39620a4254} nga interest rate sa matag P5,000 nga minimum investment sa usa ka buwan. Ilang gitawag nga “blessing” o “love-gift” ang dawaton sa matag pay-out date samtang usa ka “donation” ang tawag sa investment.//AAJ