FR. DAVE, PARI KANIADTO, ISLAM NA KARUN

Kuyog nga nakigsaulog sa mga Muslim PNP members ang ilang mga paryente ug mga kaila diin gipreparahan gyud ni General Sinas (mga hulagyay kuha ni Allan Defensor)

CEBU CITY, Philippines- Usa siya ka Katoliko nga Pari kaniadto apan karun usa na siya ka “balik Islam.” Siya mao si kanhi Fr. Dave Lebumfacil-Diaz, 39, kinsa misalmot sa gipahigayun nga Eid al-Fitr kaganihang buntag sa sulod sa Police Regional Office (PRO7) parade ground sa Camp Sergio Osmena, Sr.

“Sa akong pagtugkad akong nakaplagan nga ang Islam ang tinuod nga relihiyon,” nagkanayon si Lebumfacil-Diaz sa dihang nahinabi sa iNews.Ph kinsa mao na karun si “Dawud” nga sakop kanhi sa Order of Missionaries of the Holy Spirit (OMHS) sa dihang usa pa siya ka pari. Didto siya uwahing nagserbisyo sa Archdiocese of Palo sa Leyte partikularmente sa usa ka parokya sa Cagnocot sa Lungsod sa Villaba.

 

 

 

Matud pa ni Dawud (Arabic sa pangalan nga David) nga una siyang nagsilbi nga pari sa Sierra Bullones, Bohol ug human sa Leyte migawas siya sa pagka-pari niadtong Disyembre 2012. Siya nangatarungan nga sa tanto niyang pagbasa sa bibliya, nasuta niya nga kini wala mahasubay sa kabubut-on sa labawng makakagahum ug daghang gibuhat ang simbahang Katoliko nga sukwahi diha sa Koran (Quran) kinsa iyang natugkad sa pagbasa niya niini.

Gitumbok ni Lebumfacil-Diaz nga usa sa wala niya mahiuyoni mao ang pagpangolekta ug salapi sa mga kaparian diha sa misa ug ang pagpangayo ug bayad para sa bunyag hangtud na gani ang pagpamisa sa patay. “Kung imong tan-awon ang pagkapari is a vocation, dili ka magpabayad. Bisan wala ang bayad sa misa, padayon ka apan ang nahitabo karun ang pagkapari dili na vocation, profession na.

” Iya usab nga gipanalipdan ang mga nagtuo sa Islam kinsa daghan ug mga asawa kay matud pa niya nasuwat man usab gani kini diha sa Exodus ug daghan pa nga naa sa bibliya ug sa Quran mismo. “Walay problema kung mangita ka ug laing asawa, ayaw lang hikalimti ang imong obligasyon sa imong unang asawa.

Mao usab kini ang gisulti sa Quran, marry a woman of your choice, one, two, three or four. Walay problema ug magminyo kag daghan basta makahatag ka ug hustisya,” si Lebumfacil-Diaz miingon kinsa usa na usab ka radio anchorman sa usa ka FM station sa Dakbayan sa Toledo. Sa Facebook page niini, nasayran nga si Lebumfacil-Diaz nasakop usab sa Islam Propagation Society in Cebu.

Ang respetado nga si Ustadz Najeeb Razul ang nangulo sa selebrasyon kaganiha timaan sa pagkahuman na sa Ramadan diin nagpuasa ang mga sakop sa relihiyong Islam sa tibuok kalibutan. Ang kalihukan sa sulod sa PRO7 headquarters karun pa mahitabo alang sa mga polis ubos sa Central Visayas region nga Islam ang relihiyon.

 

 

 

Gipasabot ni PRO7 Regional Director Debold Sinas nga iya kining naandan agi ug pakig-hiusa ngadto sa mga polis nga nagtuo sa maong relihiyon. “When I was in Mindanao, I used to do this in respect to them and of course to celebrate with them,” mipasabot si Sinas ngadto sa mga tigbalita sanglit nadestino siya didto sa Zamboanga ug Caraga region sa wala pa siya madestino sa sugbu.

Kuyog nga nakigsaulog sa mga Muslim PNP members ang ilang mga paryente ug mga kaila diin gipreparahan gyud ni General Sinas ug duha ka litson nga baka ug pagkaon nga sama gyud nga nagsaulog ug dako nga okasyon.

Gipatambong ni Sinas sa maong selebrasyon ang tanang mga senior officers sa PRO7 lakip na gani si Brig. Gen. Noel Gillamac ang Regional Director sa Regional Internal Affairs Services (RIAS).//AAJ