12 KA SUSPETSADONG DRUG PUSHERS SA DANAO SIKOP

CEBU CITY, Philippines- Nabalhug karun sa presohan ang dose ka mga suspetsadong tigpayuhot ug shabu didto sa syudad sa Danao. Segun sa report ngadto sa PRO7 headquarters ni Danao City chief of police Lt. Colonel Maribel Getigan ang 12 gikan sa unom ka mga barangay sa maong dakbayan sa dihang gihimo ang sunod-sunod nga buy-bust operations niadtong Martes sa buntag, Hunyo 3.

Mga untop alas 12:00 sa tungang gabii nasikop didto sa Barangay Looc sila si Marvin Bahay, 32, taga Duterte Street Barangay Suba ug Christopher Olbes, 40, mulopyo sa Canamocan, Compostela. Nakuha gikan sa duha ang gituhoang shabu nga mitimbang ug singko gramos nga mikantidad ug P35, 700.

Human sa duruha, pagka 2:40 sa kaadlawon, nadakpan usab didto sa Barangay Dunggoan sila si Leonilo Ramos, 38, taga Pangdan Cambanay ug si Janito Castro, 23, gikan sa Dancar Dunggoan. Nakuhaan sab sila ug 5.10 gramos nga ebedensya nga mukabat sa P34, 680.00. Ikatulo nga operasyon, mga 4:05 ang takna, laing duha ang nasikop sa Barangay Taboc nga mao sila si Resil Manco Morales, 27, ug Genalyn Seco Manco, 33, pulos mga mulopyo sa Camalig Bato sa naasuy nga barangay ug nakuhaan sab ug mga ebedensya.

Ikaupat nga buy-bust dito gihimo sa Barangay Sabang pasado alas 5:00 na ang takna. Nasikop sa maong operasyon sila si Sidney Bacalla Toledo, 43, ug Gabriel Ken Cabatingan Rosal, 30, mga residente sa Barangay Poblacion Compostela. Nakuhaan ang duha sa gituhuang shabu nga mukabat ug P204, 000.00 nga mutimbang ug 30 gramos. Pagka pasado alas 6:00 na sa buntag, gipahigayun ang ikalima nga operasyon didto sa Barangay Maslog.

Nangadakpan ang mga suspetsado nga sila Jojan Olige Quino, 30, taga Barangay Basak, Compostela ug si Deolito Pilapil Tulda, 29, mulopyo sa Estaca, Compostela. Nakuha gikan kanila ang mga ebedensya nga 10 gramos nga mukabat ug P68,000. Ang ikaunom nga operasyon pasado alas 7:00 na ang takna didto mahitabo sa Barangay Tuburan Sur diin nasikop sila si Rodel Betuya, 25, kinsa mulopyo sa maong dapit ug ang usa ka 17 anyos nga menor de edad nga taga Poblacion, Danao City.

Nakuhaan sila ug ebedensya nga mubalor ug P34 mil segun usab sa report ni Lt. Col. Getigan diin ang tanang ebedensya sa unom ka operasyon mikantidad ug kapin sa P413 mil ka pesos.