28 MILYONES ANG NATULIS GIKAN SA KAPA-CEBU

Opisina sa KAPA Cebu gisunog (mga hulagway kuha ni Allan Defensor)

COMPOSTELA, CEBU, Philippines- Muabot sa P28 milyones pesos ang kantidad sa kwarta nga giingong nadala sa mga armadong tawo nga nitulis kaganihang kaadlawon, Hunyo 8, 2019, sa opisina sa Kabos Padatoon (KAPA) sa Hica, Barangay Poblacion ning maong lungsod. Kini maoy gitug-an sa usa ka KAPA staff nga lakip sa 21 ka mga tawo nga maaoy naabtan sa mga tulisan pasado ala 1:00 ang takna.

“Muabot gyud ug twenty-four million Sir nga diha sa vault ang ilang nadala,” matud pa sa tinubdan sa iNews.Ph kinsa mihangyo nga itago lang ang iyang pangalan. Matud pa hinoon ni Compostela chief of police, Major Ian Macatangay nga ila pang gikumpirmar kun pila gyud ang kantidad nga natulis.

“As to the matter of robbery we are still going under investigation process para masuta gyud nato kung unsa ang tinuod,” miingon si Macatangay sa dihang nahinabi sa iNews.Ph. Sa iyang spot report sa hitabo ngadto sa Cebu Provincial Police Office (CPPO) gitaho ni Macatangay nga napulo ka mga armadong tawo ang responsable sa maong hitabo.

Matud pa sa hepe nga sa wala pa mubiya ang mga armado ilang gibubuan ug gasolina ang usa sa mga KAPA building hinungdan nga kini naugdaw. Si Inocencio Daniel, 51, usa sa mga staff nga diha sa giingong pagtulis mitug-an sa iNews.Ph FB Live interview nga gisuwayan siya sa pagdagit sa mga armado apan nakahigayon siya sa pagdagan sa dihang iyang nabantayan nga nagkapuliki kini sa pag-alsa sa vault.

Gipasakay siya sa usa ka van nga sakyanan ug dihang nangalipat mikanaug siya ug midagan. Gawas sa vault, gitulis sab sila sa ilang kaugalingong kwarta ug mga personal nga kabtangan. Nakuha gikan kanila ang ilang mga cellphone ug dihay uban nga dunay mga laptop.

Gihulagway ni Daniel ang mga armadong tawo kinsa nagtaptap sa ilang mga nawong nga nagbitbit ug mga tag-as nga kalibre sa armas. Nagsul-ob kini ug mga fatigue uniforms. “Abi namo ug raid tung ilaha.

Naka fatigue. Gipangtiunan mi nila sa ilang armas nga tag-as unya gipahapa sa gawas sa building,” “Abi nako ug patyon ko nila maayo na lang kay pagkita nako nga medyo wala sila kabantay, midagan ko pahilayo, gani bisan ug nag-brief ra ko,” si Daniel miingon.

Gisuwayan sa pagkuha sa ilang mga reaksyon si KAPA founder Pastor Joel Apolinario ug ingon man ang nagdumala sa KAPA Cebu branch nga si Engineer Christopher Abad apan pulos wala kini mutubag sa text ug tawag sa telepono. Si Apolinario gikataho nga mihatag na sa iyang kunpirmasyon sa tulis diha sa FB Live sa KAPA page.

Sagad sa iyang pamahayag sa publiko gisibya usab sa duha ka mga FM station didto sa Mindanao, sa General Santos City ug sa Koronadal City nga gipanag-iya sa maong kapunungan. Ang Securities and Exchange Commission (SEC) ug ang kadagkuan sa kapolisan mipahimangno sa katawhan labot sa KAPA nga matud pa usa ka investment scam.

Gipanghimakak hinoon kini ni Apolinario sa makadaghan ingon man ni Abad kinsa midepensa nga usa sila ka religious group. Migarantiya sila ug 30 porcento nga interest rate sa matag investment sa minimum nga P5,000.

Ilang gitawag nga donation ug dili investment ang maong pamaagi ug ang madawat nga pay-out, “blessing” o “love gift.”/AAJ