BONG GO GIKAGUBTAN SA MGA NASUNOGAN SA SUGBU

Bong Go miduaw sa mga nasunogan sa Sitio Ponce 2, Barangay Carreta. (hulagway kuha ni Allan Defensor)

CEBU CITY, Philippines- Gikagubtan sa iyang giduaw nga mga biktima sa sunog sa Mambaling ug Carreta si Senator elect Christopher Lawrence “Bong” Go karung adlawa, Hunyo 8, 2019. Bisan ug nalangan, misuliyaw gihapon ug daw sama nga nalipay ang mga biktima sa Sitio Puntod, Mambaling kinsa naghuwat sa ilang basketball court sukad pa sa ala 1:30 sanglit niabot si Go pasado alas 4:00 na ang takna.

“Bisan ug asa mo nga eskinita, sudlon gyud tamo, mao na ang akong pangako sa mga Plipino ” matud pa ni Go kinsa usa ka Bisaya sa dihang misulti kini sa microphone nga nagtungtong sa ibabaw sa gilut-od nga monoblock chairs. Nisamot ang kisaw sa mga tawo sa dihang gi-anunsyo niya ang presensya sa mga artista nga sila si Robin Padilla ug Philip Salvador.

Sa iyang pakigpulong, gipasaligan ni Go ang mga nasunogan sa Mambaling nga gawas sa relief goods, iya usab nga patabangan sila sa uban pang ahensya sa gobyerno lakip na ang National Housing Authority (NHA) alang sa housing-program nga sila kwalipikado. Dihang gipahibawo nga dunay mga nagkinahanglan ug atensyong medikal apan nasunog ug apil ang mga ID, iya kining gipasaligan nga mahimo ra gihapon sila mudangop sa Malasakit Center.

“Wala nay ID, ID, basta Malasakit Center dili na kinahanglan ang ID lang nga mga Pilipino mi, ug wala moy ID tagaan mo sa OPAV,” sumala pa ni Go kinsa gikuyogan usab ni Sec. Michael Dino sa Office of the Presidential Assistant for the Visayas (OPAV).

Si OPAV Malasakit Center focal person Girlie Veloso nagkanayon nga dungagan pa gani ang mga Malasakit Center sa tibuok nasud diin si Dino ang nagdumala usab. Si Go mitawag ni Mambaling barangay Captain Atty. Gines Abellana ug giingnan nga iyang han-ayon sa senado nga uswagon na sa tuig 2022 ang barangay elections.

Mikabat sa 150 ka pamilya ang biktima sa sunog sa Mambaling dili pa lang dugay segun sa listahan sa Department of Social Welfare and Development (DSWD). Ang estudyante nga mga anak sa mga nasunogan iyang papalitan ug bag-ong uniporme sa eskwelahan.

Si Go, Padilla ug Salvador milahos sa Sitio Viking ug nakig “boodle fight” sa pagkaon sa mga trisikad driver sa maong dapit. Human sa Mambaling, si Go kinsa nagsakay ug motorsiklo nga 300cc Yamaha XMAX misunod sa pagduaw sa mga nasunogan sa Sitio Ponce 2, Barangay Carreta.

Notado nga “drug haven”, iyang gipahimangnoan ang mga fire victims ug ubang mulopyo didto nga dili gyud mugamit sa ginadiling drugas. Gikagubtan gihapon sila sa dihang mipatim-aw ang duha ka artista. Si Kapitan Marciano Ando na ang gitugyanan ni Go sa paghatag sa iyang hinabang.

Gipasaligan sab ni Go ang tanang mga mabdos nga diha sa iyang paghiabot nga iya kining hatagan ug pahalipay. Uban sa OPAV mipasalig si Go nga dunay ipahigayun nga medical mission didto.

Ang managtiayon nga sila si Necasio Orcullo,62, ug Proserfina,57, nangamatay sa maong sunog niadtong Mayo 11 kay wala makagawas sa ilang balay. Giimbestigar ang arson nga anggulo sa maong hitabo human matud pa dihay silingan ang mga biktima nga nagbitbit ug container sa gasolina sa wala pa ang sunog. /AAJ