Gitulis, gisunog ang opisina sa KAPA

Cebu City, Philippines – Giingong lima ka mga armadong tawo ang misulod ug misunog sa buhatan sa Kabus Padatuon (KAPA) sa lungsod sa Compostela pasado ala una ganinang kadlawon (Hunyo 8, 2019).

Matud pa ni SFO1 Gina Labay sa Compostela Fire Station nga sa mao nga oras giingong kalit nga nangabut ang armadong mga tawo nga pulos naka-itom ug armado ug tag-as nga kalibre sa armas.

Sigon pa ni Labay nga adunay di mominos 20 ka tawo ang diha sulod sa duha ka andana nga buhatan sa KAPA. Sagad sa mga tawo nga nahibilin mga panday sanglit aduna may padayon nga “construction” sa mao nila nga buhatan, “Hingpit gyud nga nahurot pagkasunog ang building”, pag-asoy pa ni Labay.

Gikahinabi sa mga tinugyanan sa Compostela Fire Station ang usa sa mga staff sa KAPA nga si Genelyn Gumapac nga nagkanayon nga kalit kaayo ang panghitabo, gipangti-unan ug gipagawas sila sa mga armadong mga tawo ug pagkataud-taud misilaab na ang kayo sulod sa ilang buhatan.

Gitino pa usab karon ang report nga gikuha sa mga armadong tawo ang “vault” sa KAPA, “Wala man mosulti ang na-interview nga gikuha ang vault”, pagpasabut pa ni SFO1 Labay.

Padayon pa karon ang imbistigasyon sa posibleng pag-ila sa mga armadong tawo nga mitulis ug misunog sa opisina sa KAPA./Ramil Paican