KAPA CEBU SARADO NA, GIBANTAYAN UG MGA PULIS”

Gisirad-an ang opisina sa KAPA Cebu sa Pob. Compostela  - Hulagway kuha ni Allan Defensor

COMPOSTELA, Cebu – Hingpit na gyung sarado ang opisina sa Kabus Padatoon (KAPA) dinhi ning maong lungsod. Matud pa ni Compostela Chief of Police Captain Ian Macatangay ang bisan kinsa nga musulod sa maong dapit sa Hica, Poblacion Compostela ilang ikiha ug “tresspassing.”

Kini matud pa niya kay giisip na nga ubos sa inbestigasyon ang KAPA sa kaso nga kalapasan sa Securities Regulation Code (RA 8799) nga giandam batok kanila busa dili gyud mahimo nga makataak ang bisan kinsa sa maong dapit hangtud nga dili pa mahuman ang inbestigasyon sanglit tipik kini nga ebedensya sa gobyerno.

Mibahad si Macatangay nga dakpon ang bisan kinsa nga musulod sa nahisgutang dapit. “I-under investigation pa man na siya, the whole area is an evidence. So the whole area will become an evidence. It will remain to be examined or investigated by the government. So as long as dili pa na siya clear, temporary shut down gyud na siya. Closed gyud na siya, so tanang musulod diha is tresspassing, so dakpon gyud nato,” matud pa ni Macatangay sa pakighinabi sa iNews.Ph.

Gani matud pa niya nga gipabantayan ug polis gikan sa 1st Provincial Mobile Force Company (PMFC) ang maong dapit arun nga dili na gyud makasulod ang bisan kinsang tawo. Gipasabot sab ni Macatangay nga miisyu na ug closure order si Mayor Joel Quino sa naasuyng dapit hinungdan nga gipatuman sab kini sa polis ilabi pa nga dihay milangkat sa tarpaulin sa unang order nga gipatik ang maong mando ni Quino gumikan sa kapakyas sa KAPA Cebu nga mulukat ug mayor’s permit lakip na ang business permit.

Gibutyag usab ni Macatangay nga padayun pa nilang gipangita ang nagduma sa maong opisina nga si Engr. Christopher Abad arun sa paghatag ug katin-awan niini sa nahitabong pagtulis ug pagsunog sa ilang buhatan niadtong Sabado sa kaadlawon, Hunyo 8. Gustong mahibaw-an ni Macatangay gikan ni Abad kun pila gyud ang kantidad sa nakuhang salapi sa gitumbok nga mga tulisan.

“As of now nangita gihapon ta ug paagi unsaon pagpangita ang manager nga si Sir Christopher Abad but mao lang gihapon negative ang atung efforts.Wa lang gihapon makontak and makit-an,” si Macatangay nisulti.

Ang pagpasirado sa KAPA Cebu office nilugdangan usab sa gipahigayun nga simultaneous raid sa mga sakop sa National Bureau of Investigation (NBI) ngadto sa mga opisina sa KAPA sa nagkalain-laing dapit sa nasud lakip na gani mismo ang pinuy-anan ni KAPA founder Joel Apolinario didto sa Dakbayan sa General Santos.

Gipahibawo hinoon sa KAPA nga mubalik ra ang ilang operasyon human sa pipila ka adlaw ingon man sa ilang mga prayer rallies nga pagahimuon timaan sa ilang panaghiusa ug pagpakita sa ilang gidaghanon. Gipasanginlan ang KAPA nga usa ka invesment scam nga pyramiding scheme apan ila kining gipanalipdan gani ilang gibutyag nga usa sila ka religious group nga kapin na sa singko milyones ang ilang sakop sa tibuok nasud lakip na ang tua sa gawas nga mga Overseas Foreign Workers (OFW).

Ang matag myembro mu-donar sa minimum nga P5,000 diin mutubo kini ug 30% matag buwan ug mutaas pa kun palugwayan sa gitawag nila nga compounding. Gikan ang KAPA sa Bislig City, Surigao del Sur apan nibalhin didto sa Alabel, Sarangani ug kalit nga mikatap sa nagkalain-laing dapit sa Pilipinas. Mibahad ang NBI nga pasakaan ug kasong large scale estafa ang mga opisyal sa KAPA./Tonton Alcos Antogop