TULIS SA KAPA CEBU POSIBLENG INSIDE JOB, 3 KA PULIS SA SUGBU NGA MYEMBRO SILUTAN

KAPA Cebu (mga hulagway kuha ni Allan Defensor)

CEBU CITY, Philippines- Gitan-aw karun sa kapolisan ang anggulo nga “inside job” sa pagtulis sa opisina sa Kabus Padatoon (KAPA) dinhi sa Sugbu. Kini maoy gibutyag ni Police Regional Director Brig. Gen. Debold Sinas sa pakighinabi kaniya sa mga tigbalita kagahapon, Hunyo 10, sa Camp Sergio Osmena Sr. PRO7 headquarters.

“We are looking into the angle na baka inside job. We are also looking into the angle na karibal, kasi accordingly kwarta nila is di mapwede i-deposito sa bangko,” miingon si Sinas. Matud pa usab hinoon sa maong opisyal nga ila pang gipalawman ang inbestigasyon sa kaso ug iyang gipapangita ang nagdumala sa KAPA Cebu nga si Christopher Abad.

 

Abad

 

Ang tulis ug pagsunog sa KAPA Cebu office didto sa Hica, Poblacion Compostela nahitabo niadtong Sabado sa kaadlawon diin matud pa armado kini ug mga tag -as sa kalibre sa armas. Tuyo ni Sinas nga maistorya si Abad tungod kay gusto gyud niya mahibaw-an kun pila gyud ang kantidad nga natulis.

Dunay niabot ni Sinas nga inpormasyon nga 5 milyones ra ang nakuha apan dunay bersyon usab nga 10 milyones apan dunay lain usab nga 28 milyones. “Actually gi claim nila around 7-10 million, the last report nga istorya mga 5 million daw tung vault natu but nag istorya na pud 28 million na pud” matud pa ni Sinas.

Gitug-an usab ni Sinas nga giisip nila nga mga “persons of interest” ang 21 ka mga kawani sa KAPA nga naatlan sa maong hitabo tungod kay nasayud kini sila nga dunay kwarta adtong orasa didto sa opisina.

Giila ang 21 nga mao sila si Inocencio Daniel, 51, Pob. Compostela, Cebu; Antonio Badal, 52, Canaway, Iligan City; Mefiel Pagpaguiton, 22, Bangkal, Davao City; Glen Anadon, 47, Tibangan, Iligan City; Jason Galapin, 18, Canaway, Iligan City; Ariel Lato, 35, Looc, Danao City; Gretchen Reyes, 30, Durano, Butuan City; Nanilyn Morite, 32, Marfil, Rosario, Agusan del Sur; Jeanilyn Gumapac, 19, Montesuerte, Carmen, Cebu; Robert Padayogdog, 31, Polo, Balamban; Hermie Casil, 20, Opao, Mandaue City; Arniel Deguinio, 23, Balogo, Guihulngan City; Peggie Joroldan, 24, Tibangan, Iligan City; Marlon Penaflor, 30, Basak, Lapu-Lapu City; Dexter Cuyos, 26, San Jose, Catmon; Felbin Gabi, 21, Tayud, Liloan; Jovanne Polancos, 28, Mangagoy, Bislig City; Edison Cabilin, 21, Opao, Mandaue City; Jay Alcano, 23, Canaway, Iligan City; ug Jerrycho Anapon, 21, Canaway, Iligan City.

Ang posibilidad nga inside job gumikan usab nga walay nahipos nga intelligence report ang PRO7 kalabot sa presensya sa mga armed robbery group ubos sa ilang area of responsibility (AOR) atul sa maong pagpanulis. Miingon si Sinas nga dunay matud pa mga remnants sa Kuratong Baleleng Gang ang nasigpatan apan hagbay ra usab kining mibiya niadtong liwas sa eleksyon. Ang mga staff sa KAPA mibutyag nga tag-as nga kalibre sa armas ang gidala sa mga nagtaptap sa nawong nga mga tulisan diin gisusi na kini sa kapolisan kun kinsa sila.

“As per intel, the usual suspects of the Kuratong naa but that was before the election. After the elections nawala na ang monitoring buot ipasabot biglang nangawala, as to this group karun, our intel is working, who are this group,” gibutyag ni Sinas. Kini samtang pasakaan ug kaso ni Gen. Sinas ang tulo ka mga polis sa sugbu nga nahibaw-an nga mga myembro sa KAPA. Miingon si Sinas nga nahibaw-an ang tulo ka myembro kay nakuhaan sila ug mga litrato.

Iyang gipasalig nga ipresentar sa media ang tulo human usab nga iya kining dis-armahan ug relibuhan ug ibutang sa floating status. Matud pa ni Sinas nga ang tulo misupak sa order/pahimangno nga walay bisan kinsa nga mga polis ang magpasakop sa KAPA ug uban pang grupo nga ilang gihulagway nga investment scam nga nigamit sa “ponzi scheme.” Ang pag-dis-arma matud pa ni Sinas usa ka “pre-empted action” arun nga dili makagamit sa ilang mga armas ang maong pulis kun ugaling mahanaw ang ilang mga investment.

Sa wala damha, gipahigayun sa NBI kagahapon ang raid sa mga buhatan sa KAPA didto sa Gensan, Butuan, Tacloban ug uban pa lakip na mismo sa Compostela ug dunay giluwatan nga closure order sa KAPA Cebu si Mayor Joel Quino. Gawas sa KAPA duna pay laing duha ang gipanid-an karun ang kapolisan dinhi sa sugbu diin susama ra usab sa KAPA ang pagpadagan nila./Tonton Alcos Antogop