RADAZA MUHATAG NA SA 1M REWARD SA SILAWAN MURDER CASE SAMTANG MGA J.O. SA LAPULAPU HATAGAN UG BONUS

Mayor Paz Radaza with Lapu-Lapu City Chief of Police Colonel Limuel Obon. (photos by Allan Defensor)

LAPU-LAPU CITY, CEBU- Gikatakda na karung semanaha ang paghatag sa 1M reward money ngadto sa kapolisan ning syudad human nila nasulbad ang Christine Lee Silawan murder case. Kini maoy gipahibawo karung adlawa ni Mayor Paz Radaza sa usa ka presscon nunot usab sa 58th charter day celebration sa syudad diin mitambong si Lapu-Lapu City Chief of Police Colonel Limuel Obon.

Miingon si Radaza nga itugyan niya ni Obon ang desisyon unsaon ang maong ganti sanglit kini man ang nahibawo sa mga tawo nga angayan nga makabahin sa maong salapi segun sa ilang natampo nga inpormasyon nga misangpot sa pagkasulbad sa maong kaso. Gani si Radaza mihatag ug “perfect 10” ni Obon sa dihang gipangutana kini kun unsa ang iyang assessment sa hepe kabahin sa peace and order situation sa syudad.

“I think its going 10,” matud pa sa Mayor kinsa miingon nga ang mga mulupyo ug turista sa ilang dapit nalipay gyud sa kahapsay ug kalinaw sa syudad, “Maayo man ang pagka-handle ni Colonel Obon. As what we have seen, ang peace and order ngari sa Lapu-Lapu maayong pagkadala.”

Si Obon ug ang iyang mga sakop maoy nakasulbad sa kontrobersyal nga murder case niadtong Abril nga miabot mismo sa atensyon ni Presidente Rodrigo Duterte tungod sa bangis nga pagkahimo sa krimen. Gawas nga gidunggab sa makadaghan gilaplapan pa gyud ang nawong sa biktima nga kolektor ug limos sa usa ka simbahang Katoliko. Nadakpan sa kapolisan ang suspetsado nga si Renato Llenes kinsa miangkon mismo sa krimen sa usa ka extra-judicial confession.

Kini samtang gipahibawo usab ni Mayor Radaza nga dunay madawat nga incentives ang mga Job Orders (J.O) sa syudad sud niining buwana. Ang matag J.O. nga miabot ug kapin sa 1,900 gibana-bana nga makadawat ug tag P10, 000. 00 isip conditional compensation premium (CCP) sanglit l nagdili man ang civil service law nga hatagan sila ug mid-year bonus dili sama sa mga regular nga kawani.

Niadtong pang Mayo na-release ang mid-year bonus sa mga kawani sa Lapu-Lapu City hall. Sayo pa niini nanghatag usab ang Radaza administration sa cash assistance nga P3,500 sa mga senior citizens ug P3, 000 sa mga persons with disabilities sa syudad. /AAJ