DRUG REHAB CENTER NGA GIDONAR SA GLOBE GISUBHAN APAN GITINGUHANG PABAYRAN

Presidential Assistant for the Visayas Secretary Michael Lloyd Dino ug outgoing governor Hilario Davide III atol sa seremonyas sa Drug Rehab Center sa lungsod sa Pinamungajan. (hulagway kuha ni Allan Defensor)

PINAMUNGAJAN, CEBU- Gisubhan karung adlawa dinhi sa Brgy. Pandacan ning maong lungsod ang P50 milyones nga drug rehabilitation center nga gi-donar sa Globe Telecom ngadto sa kagamhanan sa probinsya sa sugbu. Apan nasayran nga gusto kining pabayran ngadto sa mga pasyente nga madawat segun usab sa rekomendasyon sa consultant sa maong pasilidad nga si Manuel Pocholo delos Santos.

Giklaro hinoon ni outgoing Cebu Governor Hilario Davide lll nga depende na ni incoming Governor Gwendolyn Garcia kun unsaon niini ang pagpadagan sa pasilidad nga nahimimutang sa luna nga gipanag-iya sa munisipyo sa Pinamungajan nga ubos sa hurisdiksyon sa kapitolyo apan ang Globe Telecom ang nigasto sa pagtukod.

“I won’t be Governor anymore it would be Governor Garcia so ang policy ani will be up to her and her team.I would recommend ang atung consultant si Mister delos Santos, he knows how to run this kind of facility,” matud pa ni Davide sa mga tigbalita kinsa muluwat na sa iyang katungdanan karung udto sa Hunyo 30 ug hulipan na ni Garcia.

Didto mismo sa maong pagsubo si Presidential Assistant for the Visayas Secretary Michael Lloyd Dino kinsa mipasalig nga iyang butangan ug mga trainor gikan sa Technical Education Skills Development Authority (TESDA) ang maong pasilidad arun dunay skills training nga mahimo nilang panginabuhian ang matag drug rehab patient sa higayun nga sila mugawas. “

I will make sure, this is a promise that TESDA will come here and train those patients para pag-gawas nila naa silay trabahuon diretso. I will make sure that they don’t need to go to the TESDA office or they don’t need to go to the TESDA training center. I will bring TESDA here, that is a promise,” nagkanayon si Dino kinsa gipakpakan human niya kini gisulti.

Gidayeg ni Dino ang Globe sa katukuran sa maong pasilidad sanglit matud pa niya kinahanglan sa gobyerno ang suporta sa pribadong sektor sa pakigbatok sa suliran sa ginadiling drugas. Apan si Delos Santos mipahibawo nga segun sa ilang plano unya pa sa hinapos nga bahin ning tuiga (4th quarter) maablihan ang facility sanglit mang-hire pa sila sa mga doktor, nurses, psychiatrists ug uban pa nga maoy muatiman sa mga madawat nga pasyente diin ipaubos usab kini ug “specialized training.”

Ang matag pasyente gibana-bana nga mubayad ug P15,000.00 matag buwan nga matud pa ni Delos Santos maoy “benchmark” nga ilang ikatandi sa DOH Treatment and Rehabilitation Center sa Candabong, Argao nga gani barato pa kumpara sa usa ka pribado nga drug rehab Center nga naa sa Barangay Talamban sa Dakbayan sa Sugbu. Gipasabot ni Delos Santos nga ang P15,000.00 barato kun itandi sa bayranan sa Metro Manila nga susama ug mga kahimanan sa bag-ong natukod nga rehab center.

“Of course ug tan-aw ka sa facility this will be about ug Manila standard this will be about one hundred twenty thousand (P120, 000.00) a month kining atung facility,” matud pa ni Delos Santos. Kun ugaling mapuno ang 106 capacity nga pasilidad segun sa plano, sa P15, 000 matag pasyente, mukita kini ug labing menos P1.5 milyones matag buwan ug P9 milyones pesos sa 6 ka buwan nga gitakda nga makahuman sa rehab ang pasyente diin kadto rang “chronic” patients ang dawaton ug dili tanan nga mahimo ra sa mga community based treatments human sa ilang evaluation.

Si Patrick Steven Gloria, Globe Director for External Affairs (VisMin) mipahibawo nga ang Globe muhatag usab ug libre nga skills training sa on-line digital skills pinaagi sa Davao based economic enterprise nga “Virtualahan” diin ang usa ka pasyente nga bansayon mahimong social media strategists, Search Engine Optimization (SEO) experts ug uban pa.

Si Maita Eg-ogan ug Bimbo Bartolata, mga project managers sa Virtualahan mipasabot nga aduna silay mga module nga nakatabang na sa daghan nilang gibansay diin sila malaumon nga epektibo usab kini sa mga pasyente sa New Life Center nga gitukod haduol sa Dr. Jose Ma. V. Borromeo Memorial District Hospital.

Didto usab sa maong okasyon si Regional Director Wardley Getalla sa Phil. Drug Enforcement Agency (PDEA), Regional Director Leocadio Trovela sa DILG ug si Carmen Remedios Durano, hepe sa Cebu Provincial Anti-Drug Abuse Office (CPADAO) nga segun sa plano may dakong kalabutan sa pagpadagan sa maong pasilidad.

Ang New Life Center nga dunay solar panel roof tiles nga kumpleto sa kahimanan maoy labing una nga drug rehab center sa sugbu nga gipanag-iya ug usa ka lokal nga kagamhanan. Gisugdan kini sa pagtukod sa miaging tuig human sa ground breaking niini sa buwan sa Pebrero./AAJ