2 KA CITOM ENFORCER NADAKPAN SA BUY-BUST

Mga sakop sa CITOM, nadakpan sa buybust sa barabgay Tejero.

CEBU CITY, Philippines- Nasikop sa buy-bust operation kagabii ang duha ka mga sakop sa City Traffic Operations Management (CITIOM) nga gipahigayun sa mga sakop sa Waterfront police station 3. Si Police Major Jomar Pomarejos miila sa mga dinakpan nga sila si Ervic Navarro ug Francis Abe Mordeno kansang mga ID isip mga CITOM enforcer duna pay pirma ni outgoing Cebu City Mayor Tomas Osmena.

Didto sila nasakpi sa buy-bust operation nga gipahigayun sa Zapanta Street, Barangay Tejero pasado alas 10:00 ang takna nga gipunting sa nag-unang suspetsado nga si Reynaldo Tejado Ricarte. Naatlan gyud ang duha atul sa operasyon hinungdan nga gidakop ug apil lakip na gani ang laing suspetsado nga si Mark Minoza.

Ang kapolisan nakakuha ug 16 ka pakete nga gituhuang shabu hinungdan nga gikatakdang pasakaan sila ug sumbong karung adlawa sa piskaliya. Wa pa dayun mahibaw-i ning pagbalita kun ugaling regular o co-terminus nga CITOM enforcers sila si Navarro ug Mordeno kinsa naila sa ilang mga angga nga “Titi” ug “Abe” nga napatik usab sa ilang mga ID./AAJ