Pagpanablig ug pamato sa sakyanan sa kafiestahan ni San Juan, nakabalda sa mga byahe.

hulagway kuha ni Meeting sa mga bus operators sa Sugbu kuyog ni Jonathan Tumulak, operations manager sa Cebu South Bus Terminal. (hulagway tampo ni Jonathan Tumulak)

Gikabalak-an nga magnihit ang mga bus nga byahe ug South-West (Toledo-Pinamungahan-Tuburan) karong hapon tungod sa kapistahan sa San Juan. Kini human mipadayag ug kabalaka ang mga drivers tungod sa pagpanablig ug pamato sa mga sakyanan.

Tungod niini usa ka emergency meeting ang gipahigayon karong buntag sa mga bus controllers. Nasayran nga usa ka Calvo bus number 533 ang wa na makalahos sa siyudad kay gibato ug botilya sa beer dapit sa Lutopan,Toledo.

Kining maong kabalaka gipadayag usab ni Julie Flores, ang presidente sa Mini Bus operators sa lalawigan sa Sugbo. Gipahibawo ni Jonathan Tumulak, operations manager sa Cebu South Bus Terminal nga nakig-alayon na karon sila sa kapolisan aron mapakgang kining maong mga insidente.

Samtang mihimo gilayon ug pakisusi ang kapolisan sa dakbayan sa Toledo kalabut sa maong insidente. Sigon pa ni Staff Sergeant Bombino Enriquez nga walay nahitabong pagpanablig ug pagpamato sa ilang “area of jurisdiction” apan ilang nasayran nga nahitabo kini sa may Barangay Uling sa dakbayan sa Naga.

Gikompirmar hinoon ni Police Master Sergeant Michael Villarmia sa City of Naga Police Station nga adunay nahitabong pagpanablig ug tubig sa nahisgutang lugar. Gipadalhan dayon kini ug mga sakop sa SWAT sa Naga Police.

Nasuta nga mga minor de edad ang nanablig ug tubig sa mga nangaging mga bus ug mga pribadong sakyanan. Matud ni Villarmia nga nabadlong ug wa nay pagpanablig nga nahitabo hangtod ning pagkutlo ning maong balita.