BARKO MITIKYAOB SA SAN FERNANDO, 12 KA TRIPULANTE LUWAS

Ang barko nga natikyaob sa San Fernando (hulagway gikan sa Coast Guard Central Visayas)

CEBU CITY, PHILIPPINES- Luwas ra ang mga tripulante sa usa ka cargo ship nga mitikyaob karung hapon didto sa San Fernando, Cebu. Ang MV EVA MARY GRACE didto mitikyaob sa pantalan nga gipanag-iya sa Solid Earth Development Corp. (SEDC) nga nahimutang sa Brgy. South Poblacion sa nahisgutang lungsod.

Segun sa report sa DyLA nagkarga ug semento ang maong barko sa dihang kalit lang kining gihapak ug dakong bawod pasado alas 4:00 ang takna sa kahapunon. Luwas ra hinoon ang 12 ka mga tripulante sa barko nga gipangulohan sa Kapitan nga si Michael Zeta.

Ang crane operator nga si Manuel Encarnacion nadala sa pagkatikyaob apan naluwas ra usab kini dayon. Si Encarnacion gidali dayun sa pagdala sa SouthGen Hospital sa Dakbayan sa Naga arun kini mahiling sa mga mananambal sa maong ospital.

Ang Coast Guard Cebu station muhimo ug dugang pakisusi sa maong hitabo. Gisalikway sa coast guard ang posibilidad sa oil spill sanglit mibutang kini dayon ug oil spill boom sa dapit sa nahitabuan./balita nila ni Richie Brusas ug Leah Villagorda