P4.4 MILYONES MGA MARIJUANA NAIBOT SA UTLANAN SA TOLEDO UG BALAMBAN

P4.4 milyones nga kantidad sa mga marijuana sa utlanan sa mga bukirang bahin sa Dakbayan sa Toledo ug Lungsod sa Balamban gipang-ibot. (mga hulagway gikan sa PDEA7)

CEBU CITY, PHILIPPINES- Mukabat sa P4.4 milyones ang kantidad sa mga marijuana nga naibot sayo karung buntag, Hunyo 26, 2019, didto sa utlanan sa mga bukirang bahin sa Dakbayan sa Toledo ug Lungsod sa Balamban.

Segun sa report nga nahidangat sa Police Regional Office (PRO 7) ingon man sa Philippine Drug Enforcement Agency (PDEA 7), didto maibot ang kapin sa 11,00 ka mga punoan sa ginadili nga tanom sa Sitio Agop Dako Brgy Gaas, Balamban ug Purok 3, Brgy Tungkay sa Dakbayan sa Toledo.

Nagsugod ang mga operatiba sa pagtungas sa dapit pasado alas 2:00 ang takna sa kaadlawon ug nitapos mga alas 11:00 na ang takna sa hapit na ang paniudto. Nangulo sa maong operasyon si PDEA 7 Cebu Provincial Officer Intelligence Agent (IA3) Milva Mojado ug Police Lt. Col. Rene Kyamko sa Cebu Provincial Police Office- 1st Provincial Mobile Force Company (CPPO-PMFC) diin naglangkob sab kini sa mga sakop sa CPPO-Provincial Intelligence Branch (PIB); NAVFORCEN ug 47th IB Bravo Coy nga gipangulohan ni 1Lt Jaylord Cabahug.

Nakaipsot hinoon ang mga gituhoang mitanom sa maong mga marijuana nga naila nga sila si Alejandro Sernada Cabaña, Norwel Baculi Cabaña ug Teofilo Nodelic sanglit ilang namatikdan ang pagtungas sa mga operatiba. Ang tulo ka mga suspetsado nga pulos taga Barangay Tungkay pasakaan hinoon ug mga kasong kriminal lakip na ang posibleng paghupot ug dili lisensyadong armas batok ni Alejandro sanglit dihay nakit-an nga .45 kalibre nga pistola nga matud pa iyaha.

Nagdala ra ug igo himuong ebedensya ang PDEA 7 ug gisunog na didto sa dapit nga gitamnan ang maong mga marijuana. Taud-taud na nga panahon nga kanunay dunay madiskobre nga mg marijuana ang mga bukiran nga bahin sa Balamban ug Toledo./AAJ