TIPOLO MANDAUE IPAUBOS SA STATE OF CALAMITY HUMAN SA SUNOG

Ang hitsura sa Tipolo, Mandaue City human sa sayo sa kabuntagon nga sunog. (hulagway kuha ni Christian Maningo)

Share this on Social Media

 

 

MANDAUE CITY, PHILIPPINES- Gitinguhang ideklarar nga ubos sa state of calamity ang Barangay Tipolo ning maong syudad human kini maigo ug sunog sayo karung kaadlawon, Hunyo 27, 2019.

Si Barangay Captain Roman Cuizon miingon nga mahinungdanon ang maong deklarasyon arun usab mahatagan dayun ug tabang ang mga nasunogan nga dili mu-menos usa ka libo ka mga mulopyo ang naapektuhan.

Ang sunog gipaubos na karun sa inbestigasyon sa kabumberohan apan nasuta sa inisyal nga pakisusi nga sumala pa didto kini magsugod sa panimalay sa usa ka giilang “Aloy Basubas” kinsa mulopyo sa Basubas compound.

Gikan sa Sitio Basubas, mitabok ang kalayo sa Sitio Espina ug Sitio Maharlika. Nagsugod ang sugod ala 1:18 ang takna sa kaadlawon ug kini gideklarar nga fire control pagka alas 3:30 na sa sayung kabuntagon. Lakip sa nasunog ang 6 ka mga lawak saringan (classrooms) sa Tipolo National High School.

Sumala pa ni fire safety enforcement officer Johm Herediani nga daling mikatap ang sunog sanglit sikit-sikit ang balay sa mga biktima ug sagad ginama sa mga “light materials” ang ilang mga gipuy-an.

Nahitabo ang maong sunog tulo ka adlaw sa dili pa muhulip sa administrasyon ni outgoing City Mayor Luigi Quisumbing si Mayor elect Jonas Cortes./Gene Anthony Valenzuela

 

Ang sunog sa Tipolo, Mandaue City – (mga hulagway kuha ni Allan Defensor)

Leave a Reply

Your email address will not be published. Required fields are marked *