AHONG VS PAZ: AWAY SA OPISINA

LAPU-LAPU CITY, PHILIPPINES- Unang adlaw, una sang away tali ni Mayor Junard “Ahong” Chan ug Congresswoman Paz Radaza.

Si Mayor Chan kinsa mihulip ni Radaza niadto lang Dominggo, Hunyo 30, misuwat ngadto ni Radaza nga dili na kini makagamit sa district congressional office nga naa sa sulod sa city hall building apan nagdumili sa pagsanong niini si Radaza.

Gi-petsahan ug Hulyo 1, usa ka NOTICE TO VACATE ang gisuwat ni Chan apan mibawos ug suwat si Radaza nga dili siya mutuman niini.

“With due respect, we thus cannot heed your Notice to Vacate,” tipik sa iyang tubag nga suwat ngadto ni Chan si Radaza nagkanayon.

Gipasabot niya nga dili siya musanomg sa tinguha ni Chan tungod kay sa gitumbok nga rason ni Chan nga seksyon 455 sa local government code, nalatid man gani niini nga ang Mayor angayan nga muhatag ug opisina ngadto mga opisyal sa syudad.

Gawas pa usab nipasabot si Radaza nga dunay ordinansa ang syudad ( Ordinance No. 14-200-2019) labot sa pag-gamit sa maong opisina apan si Mayor Chan sa iyang suwat mihatag ug 24 oras nga tagal ngadto ni Radaza human madawat ang suwat nga i-bakante ang opisina.

“You are hereby notified that the Office of the Mayor shall use the premises currently assigned as office space for the House of Representatives within the Lapu-Lapu City Hall. Further, you are hereby directed to vacate the premises within 24 hours from receipt of this notice,” ang suwat ni Chan miingon.

 

 

Gipasabot ni Chan nga subay sa local government code anaay gahum ang Mayor sa pag-superbisar ug kontrol sa tanang programa, proyekto, serbisyo ug aktibidades sa syudad.

Apan si Radaza nga nagdumili sa pagsanong miawhag hinoon sa kapolisan nga inbestigahon ang panghitabo samtang gitun-an usab niya ang legal nga lakang nga buhaton batok ni Chan.

Si Radaza nga atua sa Batasan Pambansa sa Quezon City gipahibawo sa iyang mga staff nga gipugos pag-abli ang mao niyang opisina sa city hall ginamit ang barina diha sa mga lock sa pultahan niini.

Si Chan midaug batok sa bana ni Radaza nga si kanhi Congressman Arturo Radaza sa miaging eleksyon apan misang-at kini ug protesta sa Commission on Elections (Comelec) batok ni Chan.

Si Congresswoman Radaza sa iyang bahin midaug batok sa kaalyado ni Chan nga si Atty. Eugene Espedido.

Ang mga Radaza ug si Chan mga kauban kanhi sa politika apan nagkabuwag niadtong 2010 sa dihang miatbang si Chan ngadto ni Cong. Radaza sa mayoralty election niadtong tuiga./AAJ