HUGPONG SA POLITICAL OFFICERS PALAMBUON

 CEBU CITY, PHILIPPINES – Gitinguhang palambuon ang natukod nga Political Officers League of the Philippines (PolPhil). Kini suma pa ni Tuburan Vice Mayor Democrito “Aljun” Diamante, ang founder ug presidente sa hugpong sa ilang tigum niadtong Sabado sa Golden Prince Hotel.

Si Diamante nga kanhi Presidente sa League of Municipalities of the Philippines (LMP-Cebu chapter) miingon nga tinguha sa PolPhil nga ma-professionalize ang ilang hut-ong ug kini mapalig-on. Naorganisar ang PolPhil niadtong Oktobre 2018 diin nahimo usab nga haligi niini ang respetadong political officer nga si Rudy Caneda.

Gitinguha sa PolPhil nga mupahigayun ug mga seminars ug training arun nga mulambo pa ang kasinatian sa ilang mga myembro ingon man niadtong buot mupasakop niini. Si Diamante mikanaug na sa pagka-Mayor sa Tuburan niadtong Hunyo 30 apan ang iyang igsoon nga si Danilo mao karun ang Mayor sa nahisgutang lungsod.

Lakip usab sa mga haligi sa PolPhil mao si Senador Francis Tolentino ug Metro Manila Development Authority (MMDA) Chairman Danilo Lim./tahu ni Gene Anthony Valenzuela